മഞ്ഞുതുള്ളി...

പച്ചിലയിലൊരു പച്ചപ്പുഴു ....

2012-01-28T22:28:00.003+05:30

ഇത് ഒരു പൂമ്പാറ്റയൂടെ ബാല്യം ..സൂത്രക്കാരനാണേ....തൊട്ടാല്‍ ഭയങ്കര ചൊറിച്ചിലായിരിക്കും ...

ധൃതരാഷ്ട്രാലിംഗനം ..... !

2012-01-18T22:04:00.001+05:30

ഇത് ഒരു കോളിയാണ് .മരത്തില്‍ വീണ ചെറുവിത്ത് മുളച്ചു വളര്‍ന്നപ്പോള്‍ ധൃതരാഷ്ട്രാലിംഗനം പോലായി. മരത്തെ അപ്പാടെ നശിപ്പിച്ച് വളര്‍ന്നുവരുന്ന കോളിയുടെ നടുവില്‍നിന്നും മുകളിലേയ്ക്ക് നോക്കുമ്പോള്‍ ...

സൂര്യകിരീടം...

2011-12-06T21:08:00.001+05:30

വൈതല്‍മലയില്‍ കോടമഞ്ഞും മലനിരകളും ഒളിച്ചുകളി നടത്തിക്കൊണ്ടിരുന്ന ഒരു സായാഹ്നത്തില്‍ ,വെണ്‍മേഘത്തിരശീലനീക്കി മെല്ലെഎത്തിനോക്കുന്ന സൂര്യന്‍റെ ഒരു ദൃശ്യം .......

കത്താൾ......

2011-09-19T06:40:00.001+05:30

കാവുകളിലേയും മറ്റും പാറകളിൽ പറ്റിപ്പിടിച്ചുവളുന്ന കൊച്ചു സസ്യമാണ് കൽത്താൾ അഥവാ കത്താൾ.കൽത്താമര എന്നും വിളിക്കാറുണ്ട്.....

കാട്ടൂ മുന്തിരി...

2011-07-09T21:16:00.001+05:30

ഇതു കാട്ട്മുന്തിരി...അല്പം ചവർപ്പ് രസമാണ്.അധികം തിന്നാൻ പറ്റില്ല

ബേബി പൈനാപ്പിൾ...

2011-07-03T19:31:00.000+05:30

പൈനാപ്പിളിന്റെ ചെറിയ പതിപ്പാണിത്....തിന്നാൻ മാത്രമൊന്നും ഉണ്ടാവില്ല തൊലിയൊക്കെ ചെത്തിക്കളഞ്ഞാൽ...പക്ഷികൾക്കും മറ്റും വല്ലതുമൽ‌പ്പം കിട്ടുമായിരിക്കും...കേരള കർണ്ണാടക ബോർഡറിലെ ജൈവകർഷകനായ കൃഷ്ണമൂർത്തിയുടെ ഫാമിൽനിന്നാണിത്..

പുഴുജന്മം....

2011-06-22T21:13:00.000+05:30

ഇത് ഒരു നിശാശലഭത്തിന്റെ ലാർവ്വയാണ്.ശത്രുശങ്കയുണ്ടാവുമ്പോൾ ശരീരം ഈ ആകൃതിയിലാക്കി,ഉരുണ്ട തലപോലെയാക്കിയ ഭാഗത്ത് രണ്ട് പൊയ്ക്കണ്ണുകളും പ്രദർശിപ്പിയ്ക്കുന്നു..എന്താ, പേടി തോന്നുന്നുണ്ടോ ഇവനെ കണ്ടിട്ട്!...

മണിത്തക്കാളി

2011-06-12T21:03:00.000+05:30

മുളകുതക്കാളി,കാകമാതാ[കാക്കകൾക്ക് പ്രിയപ്പെട്ടത്]എന്നിങ്ങനെ പല പേരുകളുമുണ്ട്.ഹിന്ദിക്കാർ മക്കോയ് എന്നും ഇംഗ്ലീഷുകാർ ബ്ലാക് നൈറ്റ്ഷേയ്ഡ് എന്നും വിളിക്കുന്നു.കുടുംബം സൊളാനേസീ.ശാ.നാമം:സൊളാനം നൈഗ്രം.

ഒരു മീറ്റർ വരെ ഉയരം വയ്ക്കും ഈ വഴുതന കുടുംബക്കാരി.ഏകവർഷി ഓഷധിയാണ് [herb].പൂക്കൾ ചെറുതും വെള്ളനിറമുള്ളതുമാണ്.ഫലം ഏകദേശം മുക്കാൽ സെ. മീ. വലുപ്പമുള്ള ബെറി.ഇവ പാകമാകുമ്പോൾ നീലകലർന്ന കറുപ്പും പഴുക്കുമ്പോൾ മഞ്ഞയും നിറമായിരിയ്ക്കും.പഴുക്കാൻ കാക്കകൾ സമ്മതിക്കില്ല,കറുപ്പാകുമ്പോഴേ അവർ തിന്നുകളയും...

100ഗ്രാം ഇലയിൽ 5ഗ്രാം പ്രോട്ടീൻ,0.4-1 ഗ്രാം കൊഴുപ്പ്,9ഗ്രാം അന്നജം,2ഗ്രാം ഫൈബർ,200 മി,ഗ്രാം കാത്സ്യം,54-80 മി.ഗ്രാം പൊട്ടാഷ്,9മി.ഗ്രാം ഇരുമ്പ്, ഇവയും കരോട്ടീൻ,തയാമീൻ,രിബോഫ്ലേവീൻ,നിയാസീൻ,അസ്കോർബിക് അമ്ലം[വിറ്റാമിൻ സി],ബീറ്റാ കരോട്ടീൻ,എന്നിവയുണ്ട്.വിത്തിൽ ലിനോലിക്,ഒലിക്,പൽമിറ്റിക്,സ്റ്റിയറിക് തുടങ്ങിയ കൊഴുപ്പമ്ലങ്ങൾ അടങ്ങിയിരിക്കുന്നു.പച്ച കായയിലാണ് ഏറ്റവുമധികം ആൽക്കലോയ്ഡുകൾ അടങ്ങിയിരിക്കുന്നത്.വേരിലും കുറഞ്ഞ അളവിലുണ്ട്.

ഔഷധഗുണങ്ങൾ

ത്രിദോഷങ്ങൾ ശമിപ്പിക്കും.രക്തം ശുദ്ധീകരിക്കും.ചർമ്മരോഗങ്ങൾ ഇല്ലാതാക്കും.ജ്വരം, കാസം,കുഷ്ഠം,ദഹനക്കുറവ്,ഇക്കിൾ,നീർവീക്കം,വിഷം ഇവ ശമിപ്പിക്കുന്നു.കർണരോഗം,പ്ലീഹാവൃദ്ധി,നേത്രരോഗങ്ങൾ,ഗൊണോറിയ,എന്നിവയും ശമിപ്പിക്കും.

പഴകിയ ചൊറി, എക്സിമ.വീരേചനമില്ലായ്മ,മൂത്രം പോകുന്നതു കുറവ്,എലി കടിച്ചാൽ,ഹൃദ് രോഗം,വസൂരി,ചിക്കൻ പോക്സ്,....തുടങ്ങിയ രോഗങ്ങൾക്കും ഉപയോഗിക്കും....

ചെടി സമൂലം ,ഇല ,കായ്, വിത്ത് എന്നിവ ഔഷധമായി ഉപയോഗിക്കും.അധികമാത്രയിൽ ഉപയോഗിച്ചാൽ വയറിളക്കം പനി, ബോധക്ഷം ,പക്ഷാഘാതം ഇവയുണ്ടാക്കും.

ref: ഔഷധസസ്യങ്ങൾ-നേശമണി.

മണിത്തക്കാളിയുടെ അതേ രൂപഭാവങ്ങൾ ഉള്ളതും ചുവന്ന കായുള്ളതുമായ ഒരു സസ്യം ഉണ്ട്.അതിന്റെ കായ തിന്നാൻ കൊള്ളില്ല.അതിനെ മണിത്തക്കാളി എന്നു വിളിക്കാറുണ്ടൊ എന്നും അത് ഔഷധമായി ഉപയോഗിക്കാറുണ്ടോ എന്നും അറിയില്ല.മണിത്തക്കാളിക്കായ പാകമായതും പഴുത്തതും തിന്നാം ,കറിയിലിടാം.ഇല അരിഞ്ഞ് ഉപ്പേരിയാക്കാം ,പക്ഷെ,കുറച്ചേ തിന്നാവൂ,അത്രയേറെ മൂലകങ്ങൾ ഉള്ളതിനാൽ ശരീരത്തിന് അധികമാത്രയിൽ ഉൾക്കൊള്ളാനാവില്ല.

ദാരുണം....

2011-06-06T15:55:00.001+05:30

റോഡുകൾ വന്നതോടെ തവളകൾ അപകടമരണമടയുന്നതിനു കണക്കില്ല..മഴക്കാലത്ത് ഇത് വളരെ കൂടുതലാണ്..കഴിഞ്ഞ ദിവസം കാസർഗോഡ് ജില്ലയിലെ തൃക്കരിപ്പൂർ വെള്ളാപ്പ് റോഡിലൂടെ അര കിലോമീറ്റർ നടന്നപ്പോൾ നാൽ‌പ്പതോളം തവളകളെയാണ് ചതഞ്ഞരഞ്ഞ നിലയിൽ കാണേണ്ടിവന്നത്..മഴക്കാലം ഇവരുടെ പ്രണയകാലമാണല്ലോ.റോഡിനപ്പുറത്തുള്ള പ്രണയിനിയുമായി സന്ധിക്കാൻ പോകുന്ന പോക്ക് മിക്കപ്പോഴും അന്ത്യയാത്രയായി മാറുന്നു...കഷ്ടം....

അറ്റ്ലസ് ശലഭം

2011-06-01T07:53:00.000+05:30

ഇത് ഏറ്റവും വലിയ നിശാശലഭം.ആൺശലഭമാണിത്.പെണ്ണിന് കുറേക്കൂടി വലുപ്പം ഉണ്ടായിരിക്കും.

നനവിലെ കുറുങ്കൂട്ടി മരത്തിലെ ഒരു കരിയില ചുരുട്ടിക്കൂട്ടി അതിനുള്ളിലാണ് പ്യൂപ്പക്കൂടൊരുക്കിയത്.പുറത്തുവന്ന് ചിറകിലെ നനവുണക്കുമ്പോഴാണ് ഞങ്ങൾ കണ്ടത്.മുമ്പേ ഇവിടെ ഇതുണ്ടായിരിക്കാമെങ്കിലും ആദ്യമായാണ് ഞങ്ങളുടെ കണ്ണിൽ‌പ്പെട്ടത്.

ജൈവം..

2011-05-20T11:13:00.000+05:30

ഇത് ജൈവവാഴ..കാര്യമായ ഒരു പരിചരണവും ഈ പൂവൻ വാഴയ്ക്ക് നൽകിയിട്ടില്ല...ഇവിടെ പശു ഉണ്ടായിരുന്നപ്പോൾ അൽ‌പ്പം ചാണകവും ഗോമൂത്രവും ,അതും വല്ലപ്പോഴും മാത്രം നൽകിയിരുന്നു..വെള്ളം നനച്ചതും അങ്ങനെ വല്ലപ്പോഴു ഇത്തിരി വെള്ളം മാത്രം..കാര്യമായി നോക്കിയിരുന്നെങ്കിൽ കുല ഇതിലും വലുതാകുമായിരുന്നു..എങ്കിലും മോശമില്ല..പത്തു പന്ത്രണ്ടു കിലോ കാണും...സ്വാദാണെങ്കിലോ...

മുത്തശ്ശി....

2011-05-09T22:46:00.000+05:30

22 വയസ്സായ ഒരു പശുവമ്മൂമ്മയാണിവൾ....നാടനാണ്.പത്തുപന്ത്രണ്ടു പ്രസവിച്ചു...പോറ്റിയവർക്ക് ഒരുപാട് പാലും മോരും നെയ്യും ചാണകവുമൊകെ കൊടുത്തു..ഒടുവിൽ വയസ്സായി ഒന്നിനും പറ്റാതായി .അൽ‌പ്പം ഭക്ഷണവും വെള്ളവും കുടിച്ച് അല്പം ചാണകവും മൂത്രവും മണ്ണിന്റെ ഫലപുഷ്ടിക്കായി ഒപ്പം സ്നേഹവും തിരിച്ചു നൽകി ,ഇവളെ അറവുകാരനുനൽകാതെ ജീവിക്കാനായി അനുവദിക്കുന്നത് പാലക്കാട് ഞാങ്ങാട്ടിരിയിലെ ബ്രഹ്മദത്തൻ നമ്പൂതിരിയാണ്.സ്വന്തം അച്ഛനമ്മമാരെപ്പോലും വയസ്സായി ഒന്നിനും വയ്യാതായാൽ ഉപേക്ഷിയ്ക്കുന്ന ഇക്കാലത്ത് ഈ സ്നേഹം ഉദാത്തം അനുകരണീയം ...

സുന്ദരി....

2011-05-05T19:56:00.000+05:30

ഇവൾ സുന്ദരിയായ ഒരു ആടുജന്മം..

മിനൊണും മിന്റുവും...

2011-04-26T08:02:00.000+05:30

ഇവർ മിനോണും മിന്റും..അച്ഛൻ ജോൺ ബേബി..അമ്മ മിനി.ഇവരുടെ പ്രത്യേകത എന്തെന്നല്ലേ..? ഇവർ സ്കൂളിൽ പോകുന്നില്ല...മിനോണിന് അവന്റെ സമപ്രായക്കാരായ മികച്ച വിദ്യാലയത്തിൽ പഠിക്കുന്ന ഒരു കുട്ടിയുടെ നാലിരട്ടിയിലേറെ അറിവും ബുദ്ധിയും ഉണ്ട്.. അവർക്ക് തീരെ കുറവായ പ്രായോഗിക ബുദ്ധിയും പ്രതികരണശേഷിയും ഇവന് വളരെ കൂടുതലാണ്...മുതിർന്നവർ വായിക്കുന്ന ഉയർന്ന തലത്തിലുള്ള പുസ്തകങ്ങൾ വരെ ഇവൻ വായിച്ചു പഠിക്കാറുണ്ട്..നമ്മുടെ സ്കൂളുകൾ കുട്ടികളെ എത്രമാത്രം നശിപ്പിക്കുന്നുണ്ടെന്ന് ഇവനെ കണ്ടാൽ മനസ്സിലാകും.. അസാമാന്യ പ്രതിഭയുള്ള ഒരു ചിത്രകാരൻ കൂടിയാണ് മിനോൺ...

മിനോണും മിന്റുവും

ജോൺ ബേബി കുടുംബം

മൺ വീട്...

2011-04-04T20:24:00.000+05:30

മൺവീടിന് ആദ്യം ചെയ്യേണ്ടത് മണ്ണുശേഖരണമാണ്. അൽ‌പ്പം പശിമയുള്ളതും ചെറുകല്ലുകൾ അടങ്ങിയതുമായ മണ്ണൂതന്നെ വേണം..വലിയ കല്ലുകൾ അരിച്ചു മാറ്റണം .ഈ മണ്ണാണ് കുമ്മായവും വെള്ളവും ചേർത്ത് പുളിപ്പിക്കാൻ വയ്ക്കേണ്ടത് ..

അഞ്ചുദിവസത്തിനു ശേഷം,പുളിപ്പിച്ച മണ്ണ് വെള്ളം ചേർത്ത് ചവിട്ടിക്കുഴച്ച് വലിയ ഉരുട്ടുകട്ടകളാക്കും..ഇതിൽ വെള്ളത്തിന്റെ പാകം തെറ്റിയാൽ ഒക്കെ നശിച്ചു..ഉരുളയാക്കി, കെട്ടുന്ന മേസ്ത്രിക്ക് നീട്ടി എറിഞ്ഞു കൊടുപ്പാണ്..പാകം തെറ്റിയാൽ എറിയുമ്പോൾതന്നെ ഉരുളയുടെ ആകൃതി മാറും..

പിന്നെ വിദഗ്ധനായ മേസ്ത്രി ചുവർ വയ്ക്കാൻ തുടങ്ങുന്നു...ഞങ്ങൾ വീടുപണിയുടെ ഒരു ഘട്ടത്തിലും ഒരുവിധ പൂജകളും ചെയ്തില്ല...ഇത്രയും സ്ഥലം മൌന പ്രാർഥനയോടെ വീടാക്കാനായി പ്രകൃതീശ്വരിയോട് വാങ്ങുക മാത്രം ചെയ്തു..അതിനായി മുറിക്കേണ്ടിവന്ന അൽ‌പ്പം ചെടികളോടും അവിടെ താമസിച്ചിരുന്ന ജിവികളോടും ആ സ്ഥലം ഞങ്ങൾക്കായി വിട്ടുതരാൻ അപേക്ഷിക്കുകയും ചെയ്തിരുന്നു.

പക്ഷെ, പണിക്കാർ അവരുടെ വിശ്വാസമനുസരിച്ച്, ബത്തി കത്തിച്ച്,പൂവച്ച് .ഒരു ചെറു പൂജ ചെയ്തു.....

‘

ലിൻഡൽ പണി ഇഷ്ടികയ്ക്കുള്ളിൽ കമ്പി വച്ച്

ജനാലകൾക്ക് കട്ടിളയില്ലാതെയാണ് ..മുൻ വശത്തും പിൻ വശത്തുമായി രണ്ടു വാതിലുകൾക്കെ കട്ടില വച്ചുള്ളൂ

ചുവർ പൂർത്തിയായപ്പോൾ..മേൽക്കൂര ഓടു വച്ച് കോൺക്രീറ്റ് ഫില്ലിംഗ്.പകുതി സിമന്റ്, കമ്പി, പൂഴി ഇവ മതി...തണുപ്പും കിട്ടും..ഓടിനു 17 രൂപ വിലയുണ്ട്..പഴയ ഓട് ഒന്നിന് 5.50 നു കിട്ടി..

മേൽക്കൂരയുടെ അടിവശം ഇനി ഇത് ഫിനിഷ് ചെയ്യണം

സിറ്റൌട്ട് ,വർക്ക് ഏരിയ, റ്റോയ്ലറ്റ്,ബാത് റൂം ഇവ ഓടാണ്...സിറ്റൌട്ടിന് ഒരു കമാന വാതിൽ ..സിറ്റൌട്ടിന്റെ വാതിൽ ,ഇരു വശങ്ങൾ, വർക്ക് ഏരിയയുടെ ഒരു വശം എന്നിവ മുള കൊണ്ടാക്കാനാണ് തീരുമാനം .കുറച്ച് മുള ഞങ്ങൾ നട്ടത് മുറിക്കാനുണ്ട്...

പ്രധാന കെട്ടിടത്തോടു ചേർന്നു തന്നെയെങ്കിലും അൽ‌പ്പം വേറിട്ട മാതിരിയാണ് ടോയ്ലറ്റ്, കുളിമുറി, വർക്ക് ഏരിയ എന്നിവയുടെ നിർമ്മിതി...ടോയ്ലറ്റിനു മുൻ വശത്ത് ചെറിയ ഒരു കോർട് യാർഡ് [open space] ഉണ്ട്..അവിടെ അൽ‌പ്പം ചെടികളൊക്കെ വച്ച് ഭംഗി കൂട്ടാം..

കണ്ണൂർ പട്ടണത്തിൽ നിന്ന് അഞ്ചരക്കണ്ടി റോഡിൽ 16 കിലോമീറ്ററോളം സഞ്ചരിച്ചാൽ ഞങ്ങളുടെ വീട്ടിലെത്താം...ചക്കരക്കല്ലിൽ ഇറങ്ങിയാൽ റിക്ഷയ്ക്ക് 50 രൂപ കൊടുക്കണം..അല്ലെങ്കിൽ രണ്ടു കിലോമിറ്റർ കൂടി ബസ്സിലിരുന്നാൽ നാലാം പീടിക സ്റ്റോപ്പിലെത്തും...അവിടെ നിന്ന് 10 മിനുട്ട് നാട്ടുവഴിയിലൂടെ നടന്നാൽ വീടെത്തി...

ഫോൺ 9447 089027

മണ്ണ്

2011-04-03T21:50:00.000+05:30

മണ്ണ് മറ്റേതൊരു നിർമ്മാണവസ്തുവിനോടും കിട പിടിക്കുന്ന ഒന്നാണ് ...മുമ്പുള്ളവർ ഇത് ശരിക്കു മനസ്സിലാക്കിയിരുന്നു...കേരളത്തിലേപ്പോലെ ഉഷ്ണമേഖലാ പ്രദേശത്തുകാർക്ക് മൺചുമരുള്ള വീടാണ് ഏറ്റവും അനുയോജ്യം...കൊടും ചൂടിലും ഫാനില്ലാ‍തെ സുഖശീതളിമയിൽ ജീവിക്കാം...ഞങ്ങൾക്കിത് ശരിക്കും മനസ്സിലായി...നിർമ്മാണത്തിലിരിക്കുന്ന ഞങ്ങളുടെ മൺ വീടുതന്നെ ഇതിനു തെളിവ്

ഈ കിണറിന്റെ ആൾമറ മണ്ണൂകൊണ്ടാണ്...അൽ‌പ്പം പശിമയും ചെറിയ ചരൽക്കല്ലുകളുമുള്ള മണ്ണ് അൽ‌പ്പം കുമ്മായം ചേർത്ത് ,വേണമെങ്കിൽ പശിമയുള്ള കുളിർമാവ് ,കരോട്ട തുടങ്ങിയ സസ്യങ്ങളുടെ ചാറും ചേർത്ത് പുളിപ്പിച്ച് വലിയ ഉരുളകളാക്കി മെനഞ്ഞെടുക്കുന്ന രീതിയാണിത്..നല്ല ഉറപ്പാണിതിന്...വർഷങ്ങളോളം മഞ്ഞും മഴയും വെയിലുമൊക്കെ കൊണ്ടിട്ടും ഒരു കേടുപാടുമുണ്ടായിട്ടില്ല....ചക്കരക്കല്ലിലുള്ള ഈ കിണർ പക്ഷെ ,വീട്ടുകാർ പൊളിക്കാനാണ് വിചാരിക്കുന്നത്..

മൺചാന്ത് ഉപയോഗിക്കുമ്പോൾ സിമന്റ് ,പൂഴി എന്നിവ ഒഴിവാക്കാം...ഇതാ മണ്ണൂപയോഗിച്ചു കെട്ടിയ

ഒരു മതിൽ..

വെട്ടുകല്ല്, കരിങ്കല്ല്,പൂഴി, സിമന്റ് തുടങ്ങിയ പ്രകൃതിവിഭവങ്ങൾ തീർന്നുകൊണ്ടിരിക്കെ,സിമന്റുണ്ടാക്കുന്ന ആരോഗ്യ പ്രശ്നങ്ങളും ഇത്തരം വീടുണ്ടാക്കുന്ന ചൂടുമോർക്കുമ്പോൾ നമുക്കു നിർമ്മാണസങ്കൽ‌പ്പങ്ങൾ പൊളിച്ചെഴുതിക്കൂടേ...?

മൺതവള.....

2011-04-01T20:39:00.000+05:30

ഇത് ഒരിനം മൺതവള....മണ്ണിനടിയിൽ ജീവിക്കുന്നു..

GIANT WOOD SPIDER.....

2011-03-24T16:44:00.000+05:30

ഇത് നനവിലെ മറ്റൊരു അന്തേവാസി..വലിയ കാട്ടുചിലന്തി...മരങ്ങൾ കൂടുതലുള്ള സ്ഥലങ്ങളിലും ജലാശയങ്ങൾക്കരികിലും ഇവ ജീവിക്കാനിഷ്ടപ്പേടുന്നു...

അടിവശവും മനോഹരം...

ഇവന്റെ രണ്ടു കാലുകൾ ഏതോ ഇരതേടിയുടെ ആക്രമണത്താൽ നഷ്ടമായി..

മരച്ചിലന്തിയുടെ മറ്റൊരു ദൃശ്യം...

ആൺ ചിലന്തി...ഇവൻ തീരെ ഇത്തിരിക്കുഞ്ഞനാണ്

ഓന്തുകൾ....

2011-03-20T21:58:00.000+05:30

ഇത് ഞങ്ങളുടെ പറമ്പിലെ ഒരു ഓന്തു കുട്ടൻ..പച്ചിലകൾക്കിടയിൽ ഇളം പച്ചനിറമാർന്ന്....പരിസരത്തിനനുസരിച്ച് നിറം മാറാനിവൻ മിടുക്കൻ...പക്ഷെ ,നിറം മാറുന്നത് മറ്റു കാര്യസാധ്യങ്ങൾക്കൊന്നുമല്ല,ശത്രുക്കളിൽനിന്ന് രക്ഷനേടാനായി മാത്രമാണേ...

ഇവനെ കാട്ടിലാണു കണ്ടത്...എത്ര സമർഥമായാണ് പരിസരത്തിനനുകൂലമായി നിറം മാറിയിരിക്കുന്നത്!!1

തലയിൽ മുള്ളുകളുള്ള ഇവൻ കാനനവാസിയാണ്..മരത്തിന്റെ അതേ നിറം...

ഇവനും ഒരു കാട്ടോന്താണ്...

മഞ്ഞച്ചേര

2011-03-18T17:04:00.000+05:30

രണ്ടുമീറ്ററോളം നീളമുള്ളയീ മഞ്ഞച്ചേരയെ കാണാനേറെ ഭംഗിയുണ്ട്...നല്ല സ്വർണ്ണവർണ്ണമാർന്ന ഒരു സുന്ദരൻ...കുറേ കാലമായി ഇവൻ/ൾ ഇവിടെ താമസം തുടങ്ങിയിട്ട്..

ഇവൻ ഞങ്ങളുടെ ആമ്പൽക്കുളത്തിലെത്തുന്നത് കുളിക്കാനല്ല,ഭക്ഷണം കഴിക്കാനാണ്..ഇവിടെ തവളയും ഗപ്പിമീനുകളും ഒക്കെയുണ്ട്..

പക്ഷെ, ഇവനൽ‌പ്പം ശല്യംചെയ്യുന്നുണ്ട് ഞങ്ങളെ.ഗപ്പികളെ വല്ലാതെ തിന്നൊടുക്കിക്കളയുന്നു..

എന്നാലും ഞങ്ങൾക്കിവനെ ഇഷ്ടമാണ്..ഇവനൊരിക്കൽ സർപ്പപ്പരുന്തിന്റെ [serpant eagle]വായിലകപ്പെട്ടതായിരുന്നു.ഭാരക്കൂടുതൽ കാരണം പരുന്തിനിവനെയും കൊണ്ട് പറക്കാൻ വിഷമമായിരുന്നു...അപ്പോഴാണ് ശല്യക്കാരായ കാക്കകൾ എത്തിയത്..അവരുടെ ആക്രമണം സഹിക്കാതായപ്പോൾ ഇവനെ പരുന്ത് താഴത്തിട്ടു കളഞ്ഞു...

ആമ കാരാമ...

2011-03-16T20:26:00.000+05:30

ഇവൻ കാരാമ..ഇന്നാണിവൻ നനവിലെ ആമ്പൽക്കുളത്തിലെത്തിയത്....കശാപ്പുകാരുടെ കൈയ്യിൽനിന്നും ഒരു സുഹൃത്ത് രക്ഷപ്പെടുത്തി ഞങ്ങളുടെ അടുത്തെത്തിച്ചതാണിവനെ...പേടിച്ച് തലയും ഉള്ളിലാക്കി കിടന്ന ഇവൻ/ൾ വെള്ളം കണ്ടയുടൻ തല വെളിയിലേക്കിട്ടു കുളത്തിലേയ്ക്കൂളിയിട്ടു തീറ്റ തുടങ്ങി.ഒരു കൂട്ടു കൂടി വേണമായിരുന്നു ഇവന്..ബാലു എന്ന് പേരിട്ട ഇവൻ ഇവിടെ വളരട്ടെ..

എന്തൊരോമനത്തമുള്ള ജീവി... ഇവനെ തല്ലിക്കൊല്ലാനും ചുട്ടുതിന്നാനുമൊക്കെ എങ്ങനെ മനസ്സു വരുന്നു...

FLAME OF FOREST....

2011-03-15T19:56:00.000+05:30

ചമത പൂത്താൽ കാടിനു തീ പിടിച്ചപോലെയാണ്...വളരെ വളരെ പണ്ട് ആശ്രമവാസികൾ ചമതക്കമ്പുകളത്രെ വിറകായി ഉപയോഗിച്ചിരുന്നത്...ഇപ്പോൾ ഇതൊരപൂർവ്വവൃക്ഷം...ഇവിടെ നനവിൽ ഒരു ചമതത്തൈ ഉണ്ട്...വളരെ മെല്ലെയാണ് വളർച്ച....

ശ്യാമയാം കാനനമോഹിനീ....

2011-03-06T21:23:00.000+05:30

ഒരു മഴക്കാട്...അതിനേക്കാൾ അത്ഭുതകരമായ എന്തെങ്കിലും ഈ മണ്ണിലുണ്ടോ.....ജൈവവൈവിധ്യത്തിന്റെ കേദാരഭൂമിയാണ് മഴക്കാടുകൾ...ഒപ്പം എല്ലാ സീസണിലും പൂക്കുകയും കായ്ക്കുകയും ചെയ്യുന്ന വിവിധ സസ്യങ്ങൾ ഇവിടെയുണ്ടാകും...അതിനാൽ അവയെ ആശ്രയിക്കുന്ന വൈവിധ്യമാർന്ന ജീവജാലങ്ങളും...ഇവിടെ ഇലകൾ പോലും നിറത്തിലും രൂപത്തിലും ഒന്നിനൊന്ന് വ്യത്യസ്തമായിരിക്കും... ഒപ്പം പല നിറങ്ങളിൽ കാണപ്പെടുന്ന തളിരുകൾ കൂടിയാകുമ്പോൾ പൂത്തുലഞ്ഞപോലെ അപൂർവ്വ കാന്തിയോടെ ശോഭിക്കുന്നു..

സായാഹ്നം....

2011-03-04T19:12:00.000+05:30

ഒരസ്തമനം കൂടി...

പവനുരുക്കിയൊഴിച്ച്

മണ്ണിനു വിണ്ണിൻ കാന്തിയേകി

പകലോൻ ദിനാന്ത്യവിശ്രമത്തിനായ്

ചക്രവാളസീമ കടന്നുപോകുമ്പോൾ

മനസ്സിൻ ഭാരങ്ങളിറക്കാം

നമുക്കുമീ സൌവർണ്ണകാന്തി

മനംനിറയേ മോന്തി....

മുല്ല...

2011-03-02T13:00:00.000+05:30

വയനാട്ടിൽനിന്നും കിട്ടിയ ഒരിനം മുല്ല...മുറ്റത്തെ മുല്ലയ്ക്ക് മാത്രമല്ല ഇതിനും നല്ല മണമാണ്..

ബ്രഹ്മി.....

2011-02-19T21:51:00.000+05:30

ഓർമ്മശക്തി വർധിപ്പിക്കുന്ന ഒരു കുഞ്ഞുചെടിയാണ് ബ്രഹ്മി...പുഴയോരത്തെ ചെളിത്തിട്ടകളിലും വയലുകളിലും നന്നായ് വളരും ..നിലം പറ്റി വളരുന്ന ബ്രഹ്മിയ്ക്ക് നന്നായി നനവ് വേണം...ഇതിലുള്ള സ്വർണ്ണമാണ് ഓർമ്മയെ നിലനിർത്താനും വർധിപ്പിക്കാനും സഹായിക്കുന്നത്..സ്വർണ്ണം എന്നാൽ മഞ്ഞലോഹരൂപത്തിൽ മനുഷ്യൻ കൊതിയോടെ വാങ്ങിക്കൂട്ടുന്ന സ്വർണ്ണമല്ല,സസ്യങ്ങൾ മണ്ണിൽ നിന്നും വലിച്ചെടുത്ത് ജൈവരൂപത്തിലാക്കുന്ന biological gold ആണ്..ഇതിനെ മാത്രമേ ജീവികൾക്ക് ഉപയോഗിക്കാനാകൂ...മുത്തിൾ ,പൊന്നാങ്കണ്ണി എന്നിവയും ഓമ്മശക്തി വർധിപ്പിക്കാൻ സഹായിക്കുന്നു...7 വയസ്സുവരെ പ്രായമുള്ള കുട്ടികൾക്ക് പതിവായി ഒരു സ്പൂൺ ബ്രഹ്മി നീരു കൊടുത്താൽ അവൻ അസാമാന്യ ഓർമ്മയും ബുദ്ധിയും ഉള്ളവനായി മാറും...14 വയസ്സുവരെ കുറച്ചു ഫലം ഉണ്ടാകുമെങ്കിലും ,പിന്നിട് സ്മൃതികോശങ്ങൾ ഉണ്ടാവാത്തതിനാൽ ഓർമ്മശക്തി വർധിപ്പിക്കാനാവില്ല..എന്നാൽ ഉള്ള ഓർമ്മ നിലനിർത്താനും അൾഷിമേഴ്സ് പോലുള്ള അസുഖങ്ങൾ വരാതിരിക്കാനും സഹായിക്കും.

കടുക് പൂത്തപ്പോൾ..

2011-02-17T23:01:00.000+05:30

വയനാട്ടിൽ നിന്ന് ഒരു കടുകിൻ പൂക്കലം...

ചന്ദ്രികാചർച്ചിതമാം.....

2011-02-15T19:42:00.000+05:30

എത്ര കണ്ടാലും മതിവരില്ല

ചന്ദ്രികാചർച്ചിതരാവിൻ

കുളിരോലുമീ നിറഭംഗി....

കവികളെത്ര പാടിപ്രകീർത്തിച്ചു

വിരഹിയാം കാമുകഹൃദയങ്ങളെത്ര

നീറിപ്പിടഞ്ഞു ,ഹാ ! ചന്ദ്രികേ..

എങ്കിലും, നീ വാനിന്നിരുളിൽ

ചിരിതൂകിനിൽക്കെ,

വർണ്ണമിത്തിരി ചാലിച്ചു പുരട്ടി

ഏതു ഹൃത്തിനെയാണു

ധന്യമാക്കാതിരിക്കുക....

കിലുകിലുക്കി......

2011-02-10T17:07:00.000+05:30

ഈ കാട്ടുചെടിയുടെ [Crotaleriya ] കായ ഉണങ്ങിയാൽ കുട്ടികളുടെ കിലുക്ക് പോലെയാണ്...പൂമ്പാറ്റകളുടെ ഇഷ്ടചെടിയാണിത്...ഇതിൽനിന്നും കോമൺ ക്രോ, നീലക്കടുവ,വരയൻ കടുവ ,എരിക്കുതപ്പി ...തുടങ്ങിയ പൂമ്പാറ്റകൾ കൂട്ടമായി വന്ന് ചാറ് ഊറ്റിക്കുടിക്കാറുണ്ട്...ഇതിൽനിന്നും ലഭിക്കുന്ന ഒരു ആൽക്കലോയ്ഡ് അവയ്ക്ക് ഇണയെ ആകർഷിക്കാനുള്ള ഫെറമോൺ നിർമ്മാണത്തിനാവശ്യമാണ്...

വേള....

2011-02-05T22:13:00.000+05:30

ഇത് വേള ..പുതുമഴയ്ക്കു ശേഷം പറമ്പുകളിലൊക്കെ തകരയ്ക്കൊപ്പം താനേ മുളക്കുന്ന ഒരു കൊച്ചു ചെടി..നായ്ക്കടുക്,കാട്ടുകടുക് എന്നുമൊക്കെ പേരുകളുണ്ട്....നല്ല കൈയ്പ്പുരുചിയുള്ള ഈ ചെടി ഒരു കീടനാശിനിയും പച്ചിലവളവുമാണ്....മണ്ണിലെ കീടങ്ങളെ നിയന്ത്രിക്കുന്നു...ഇതിന്റെ തളിരില ഉപ്പേരിയാക്കാം..അധികം കഴിച്ചാൽ വയറിളകും...ഇതിന്റെ ബന്ധുവായ നീല പൂക്കളുള്ള ആര്യവേളയിലാണ് സൈക്കി എന്ന പൊട്ടുവെള്ളാട്ടി എന്ന വെള്ളയിൽ കറുത്ത പൊട്ടുള്ള ചിറകുമായി നൃത്തമാടി നടക്കുന്ന കൊച്ചുപൂമ്പാറ്റ മുട്ടയിടുന്നത്..ആര്യവേളയുടെ തളിരും ഉപ്പേരിയാക്കാം..

കള്ളികൾ !!!....

2011-01-30T11:43:00.000+05:30

ഇവർ രണ്ട് കള്ളികളാണ് .ഒരുപാടിനം കള്ളികളുണ്ട്...അലങ്കാരത്തിനായി വീട്ടിൽ ഈ കള്ളികളെ വളർത്താം. വാങ്ങാനൽ‌പ്പം ചെലവു ചെയ്യണമെന്നല്ലാതെ ഈ പാവം കള്ളികളെ വളർത്താൻ വലിയ ചെലവൊന്നുമില്ല...

പുഷ്പോത്സവം 4 സീനിയാ..

2011-01-29T19:51:00.000+05:30

പുഷ്പോത്സവം...3

2011-01-28T22:00:00.000+05:30

ഒരു പൂവായ് പിറക്കാനായെങ്കിൽ...

ഡാലിയാ...

2011-01-26T11:55:00.000+05:30

കുറച്ചുകൂടി പുഷ്പോത്സവക്കാഴ്ച്ചകൾ

ചെമ്പരത്തികൾ...

2011-01-23T13:31:00.000+05:30

പുഷ്പോത്സവം കണ്ണൂർ 2011 കാണാൻ ഇപ്രാവശ്യം തുടക്കത്തിൽതന്നെ പോകാൻ പറ്റി.പൊതുവെ അവസാന ദിനങ്ങളിൽ, പൊലിമ കുറഞ്ഞ ശേഷമേ ഞങ്ങൾക്ക് അവിടെ പോകാൻ സമയം കിട്ടാറുള്ളൂ... നിറങ്ങളുടെ സ്വപ്നലോകത്ത് പൂമ്പാറ്റകളായ് പറന്നു നടന്നു...ഫോട്ടോ പിടിച്ച് പിടിച്ച് ക്ഷീണിച്ചുപോയി..അത്രയേറെ സുന്ദരദൃശ്യങ്ങൾ...അതിൽനിന്നും കുറച്ച് ഇവിടെ കൊടുക്കുന്നു...

വലകൾ......

2011-01-15T19:49:00.002+05:30

പ്രകൃതിയിലെ വലനെയ്ത്തുകാരാണ് ചിലന്തികൾ...പലയിനം വലകളുണ്ട്..വലുപ്പം ,രൂപം എന്നിവയിൽ തികച്ചും വ്യത്യസ്തത പുലർത്തുന്നവയാണ് ഓരോയിനം ചിലന്തികളുടെ വലകളും..വല നെയ്യാതെ ഇരയെ ചാടിപ്പിടിക്കുന്ന ഒരുപാടിനങ്ങളും ചിലന്തികളുണ്ട്...

ഇത് സാധാരണയായി കാണപ്പെടുന്ന വട്ടവല..വൃത്താകൃതിയിൽ മനോഹരമായി ഇതു നെയ്യാൻ വിദഗ്ധനായ ഈ വേട്ടക്കാരന് അധികം സമയമൊന്നും വേണ്ട.

ഇത് തുരങ്കച്ചിലന്തിയുടെ പരന്ന വല[sheet web] പ്രഭാതമഞ്ഞിലിവ പുൽ‌പ്പരപ്പുകളിൽ മനോഹരമായ കാഴ്ച്ചയായിരിക്കും

മറ്റൊരു വലയും വലക്കാരനും..

ആയിരക്കണക്കിനു സിൽക്കുവലകളാൽ മൂടിയ ഒരു നെൽ‌പ്പാടം..ഇത് പ്രകൃതിയുടെ ഒരു പ്രതിഭാസമാണ്...എല്ലാ വർഷവും ഇതുണ്ടാവാറില്ല..ഏതെങ്കിലും പ്രാണികൾ അധികമാവുമ്പോൾ ചിലന്തികളുടെ എണ്ണം വളരെയേറെ വർധിപ്പിച്ച് അവയെ നിയന്ത്രിക്കുന്നു...

മറ്റൊരു സ്റ്റൈലൻ വല...

അത്ര ഭംഗിയില്ലാത്ത വല നെയ്ത ഒരു സുന്ദരി....

വുഡ് സ്പൈഡറിന്റെ ഭീമൻ വല....

നന്നെ ലോലമെന്നു തോന്നിക്കുന്ന ചിലന്തിവലകൾക്ക് ഉരുക്കിനേക്കാൾ ബലമുണ്ടത്രെ...നന്നെ നേർത്ത ഈ നൂലുകൾ ഒന്നിച്ചു ചേർത്ത് ഒരു വസ്ത്രമുണ്ടാക്കാനായാൽ വെടിയുണ്ടയ്ക്കുവരെ അത് തുളച്ചുകയറാനാവില്ലത്രെ..

പൂക്കളെപ്പോലെ ചിരിക്കേണം...

2011-01-09T17:16:00.001+05:30

കണ്ണൂരിൽ ഫാം ഫെസ്റ്റ് കാണാൻ ചെന്നപ്പോൾ കുറേ സുന്ദരികളുണ്ട് ചിരിതൂകി നിൽക്കുന്നു...മനസ്സിന്റെ എല്ലാ സംഘർഷങ്ങളും മാ‍റ്റാൻ പൂക്കൾക്ക് അപാരമായ കഴിവാണുള്ളത്....കുറച്ച് പൂച്ചിരികൾ ഇവിടെ മഞ്ഞുതുള്ളിയിലേയ്ക്കും.......

പാൻസി..

ആസ്റ്ററുകൾ...

ഡെൻഡ്രോബിയം..

ഒരിനം ഓർക്കിഡ്..ഇതോടൊപ്പം കുറച്ച് ഓർക്കിഡുകൾ കൂടി....

പൂക്കളെപ്പോളെ നിർമ്മലമായ മനസ്സോടെ ജീവിക്കാനാകുന്നവർ എത്ര ഭാഗ്യവാന്മാർ...ലോകത്തിനു മുഴുവൻ ആനന്ദം പകർന്നുകൊണ്ട്...

നാഗലിംഗപ്പഴം..

2011-01-04T22:42:00.000+05:30

ഇത് നാഗലിഗമരത്തിന്റെ പഴം...പൊതുവെ സർപ്പക്കാവുകളിലാണ് ഈ മരം നട്ടുവളർത്തുന്നത്.നല്ല വലുപ്പമുള്ള പഴങ്ങളാണ്.പിങ്ക് നിറമുള്ള പൂക്കളുടെ കേസരങ്ങൾ പാ‍മ്പ് പടം വിടർത്തിയപോലാണ്.അതുകൊണ്ടായിരിക്കാം നാഗലിഗപ്പൂ എന്ന പേരു വന്നത്.മൂട്ടിൽപ്പൂവിനെപ്പോലെ.തായ്ത്തടിയിലാണ് പൂവുണ്ടാകുന്നത്..

മിക്കി മൌസ് ബെറി.....

2010-12-29T15:08:00.000+05:30

മിക്കി മൌസിനെ ഓർമ്മിപ്പിക്കുന്ന ഈ പഴം ഹരിപ്പാട്ടുള്ള ഒരു കൂട്ടുകാരിയുടെ വീട്ടിലേതാണ്...

ഇത് മിക്കിമൌസ് ബെറിയുടെ പൂവ്....

സാഫല്യം...

2010-12-24T17:01:00.000+05:30

അമ്മക്കിളിയുടെ പ്രതീക്ഷ സഫലമായി...ചെമ്മണിമുട്ടകളിൽ ഒന്ന് വിരിഞ്ഞിരിക്കുന്നു..ഫോട്ടോഗ്രാഫർ ചെന്നു നോക്കുമ്പോൾ തോടു പൊട്ടിച്ച് പുറത്തുവന്നതേയുണ്ടായിരുന്നുള്ളു.അമ്മ അരികിലില്ലായിരുന്നു...അടുത്ത രണ്ടു ദിവസങ്ങളിലായി രണ്ടുപേർകൂടി പുറത്തുവരും...പക്ഷെ, അതു കാണാൻ ഫോട്ടോഗ്രാഫർ സ്ഥലത്തുണ്ടാവില്ല..പത്തുദിവസത്തെ ക്രിസ്മസ് അവധിയും കഴിഞ്ഞ് ചെല്ലുമ്പോഴേയ്ക്കും അവർ പറക്കമുറ്റിയിരിക്കും....എന്തായാലും അതു നന്നായി... കുസൃതികളുടെ ശല്യമില്ലാതെ അവർക്കു പാറ്റം പഠിക്കാമല്ലോ...

ധന്യയായൊരമ്മ...കുഞ്ഞിനു കാവലിരിപ്പാണവൾ...ഇനിയവൾക്ക് തിരക്കിന്റെ നാളുകൾ...വേഗം വളരാനായി മക്കൾക്ക് ഒരുപാട് തീറ്റവേണം.അച്ഛനും സഹായിക്കും മക്കളെ തീറ്റാൻ....

കുസൃതിക്കുരുന്നുകൾ....

2010-12-18T20:21:00.000+05:30

ചേച്ചിയുടെ മുടിയൊന്ന് വലിച്ചുനോക്കട്ടെ....

ബാല്യത്തിന്റെ നിഷ്കളങ്കമായ കുസൃതികൾ പോയ്പോയ കാലത്തിന്റെ നഷ്ടസ്മരണകളായി ,വല്ലാത്തൊരു ഗൃഹാതുരതയായി...ഒരിക്കൽക്കൂടിയാ വഴികളിലൂടെ നടക്കാൻ വെറുതെയൊരു മോഹം...

പ്രതീക്ഷ...

2010-12-16T19:07:00.000+05:30

അമ്മക്കിളി പ്രതീക്ഷയോടെ കാത്തിരിക്കുകയാണ് , മുട്ടകൾ വിരിയാൻ...ചെമ്മണിച്ചുണ്ടുകൾ പിളർത്തി ‘അമ്മേ, വിശക്കുന്നു..’എന്നു നിലവിളിക്കുന്ന കുഞ്ഞുങ്ങളുണ്ടാകാൻ..പറക്കമുറ്റുംവരെ അവരെ കണ്മണിപോലെ കാത്തുസൂക്ഷിക്കാൻ....

ഒപ്പം എനിക്കും ആശങ്കയോടെ കാത്തിരിക്കേണ്ടി വന്നിരിക്കുന്നു...ചെമ്മണിമുട്ടകൾ വിരിഞ്ഞ് ആപത്തൊന്നുമില്ലാതെ ആ കുഞ്ഞുങ്ങൾ പറന്നുപോകുമോ? കാരണം അമ്മക്കിളി കൂടുകൂട്ടിയിരിക്കുന്നത് ആയിരത്തിലേറെ വികൃതിക്കുരുന്നുകൾ പഠിക്കുന്ന ഒരു വിദ്യാലയമുറ്റത്തെ അരമീറ്റർപോലും പൊക്കമില്ലാത്ത വേലിച്ചെടിയിലാണ്.ഒരു കുഞ്ഞുവിരലാ കൂട്ടിലേയ്ക്ക് നീണ്ടാൽ....അമ്മയുടെ പ്രതീക്ഷകൾ അതോടെ തീരും...അമ്മയുടെ പ്രതീക്ഷകൾ സഫലമാകാൻ പ്രാർഥനയോടെ...

ഇരട്ടത്തലച്ചി [Red whiskered bulbul ] എന്ന മണ്ടൻപക്ഷിയുടെ കൂടാണിത്..ഇവയ്ക്ക് കൂടുകൂട്ടാൻ ഒളിവും മറവും ഒന്നും വേണ്ട, പറമ്പിൽ കൂട്ടിയിട്ട ഇല്ലിക്കൂട്ടത്തിലും വീട്ടുമുറ്റത്തും വാഴയുടെ ഉണങ്ങി താണുകിടക്കുന്ന ഇലകളിലും തീരെ താഴ്ഭാഗത്ത് ഇങ്ങനെ കൂടൊരുക്കുന്നതിനാൽ പത്തിലൊന്നു കൂടുപോലും രക്ഷപ്പെടാറില്ല..

കിണർ...

2010-12-11T20:27:00.000+05:30

കാരണവന്മാർ കുന്നിനു മുകളിൽ പ്രകൃതിയെ നശിപ്പിക്കാതെ ചെറിയ വീടു വച്ചു..കിണറും തീർത്തു....അവരുടെ മനസ്സിൽ നന്മയുണ്ടായിരുന്നു..അവർക്ക് അറിവും വിവേകവും ഉണ്ടായിരുന്നു...കുന്ന് ജലസംഭരണിയാണെന്നും, തന്റെ കിണറിൽ അറ്റ വേനലിലും ഈ സംഭരണി ജലമേകുമെന്നും അവർ തിരിച്ചറിഞ്ഞു..

കാരണവന്മാർ കുന്നും വീടും കിണറുമൊക്കെ സ്നേഹപൂർവ്വം അനന്തരാവകാശികൾക്ക് നൽകിയിട്ട്

മണ്ണു വിട്ടു പോയി...ദുര മൂത്ത പുതു തലമുറയ്ക്ക് കാണാനായില്ല കാരണവന്മാരുടെ വിവേകം..അവർക്ക് വീടെടുക്കാൻ കുന്നിനെ നിരപ്പാക്കണമത്രേ!! പണം എന്ന മന്ത്രം മാത്രം ജപിക്കുന്ന അവർ കുന്ന് മണ്ണാക്കി വിറ്റു കീശയിലാക്കി...അപ്പോൾ ദാഹജലമേകിയ കിണർ ഈ അവസ്ഥയിലുമായി...അതിനിനി വെള്ളം സംഭരിക്കാനാകുമോ?...വെള്ളമേകേണ്ട കുന്നെവിടെ???

നാളെ വരും തലമുറ ചോദിക്കും, എന്റെ കുന്നെവിടെ ?കുടിവെള്ളം സംഭരിക്കുന്ന കുന്നുകൾ കാരണവന്മാർ നിങ്ങൾക്ക് കൈമാറിയിരുന്നില്ലേ??..അവ ഞങ്ങൾക്ക് കൈമാറാതെ നിങ്ങൾ വിറ്റു തിന്നില്ലേ? ...

ഇലകൾ പച്ചയല്ല...

2010-12-05T22:24:00.011+05:30

ആൽബട്രോസും.ചോലവിലാസിനിയും..

2010-11-27T17:00:00.006+05:30

ലവണം നുണയൽ[Mud puddling]

മങ്ങിയ മഞ്ഞനിറമുള്ള ആൽബട്രോസ് പൂമ്പാറ്റകൾ എല്ലാവർഷവും ലക്ഷക്കാണക്കിനു വരുന്ന സംഘങ്ങളായി ദേശാടനം നടത്തുന്നവയാണ്...ആറളം കാട്ടിലൂടെയുള്ള ഇവയുടെ ദേശാടനം സർവ്വെചെയ്തപ്പോൾ ഈ വർഷം 3 മണിക്കൂറിൽ അര ലക്ഷത്തോളം എണ്ണം ഒരു പോയന്റ് കടന്നു പോയി. അണമുറിയാത്ത ഒരു അരുവി വായുവിലൂടെ ഒഴുകിപ്പോകുമ്പോലത്തെ ആ കാഴ്ച ഒരത്ഭുതമായിരുന്നു...ഒപ്പം ആയിരക്കണക്കിന് പൂമ്പാറ്റകൾ പുഴയോരത്തെ ഉപ്പുരസം നുണയാൻ നിരന്നിരിക്കുന്ന മറ്റൊരത്ഭുതവും.....ഇവർക്കൊപ്പം ദേശാടനം നടത്തുന്ന അനേകം പൂമ്പാറ്റകളിൽ ചോലവിലാസിനിയും ഉണ്ട്..നാട്ടിൻ പുറങ്ങളിൽ കാണുന്ന വിലാസിനിയുടെ ബന്ധുവാണ്
ചോലവിലാസിനി..ചുവന്ന ബോർഡറുള്ള മഞ്ഞ സാരിയുമുടുത്ത് വിലാസവതിയായ ഒരു സുന്ദരിയെപ്പോലെ അലസമായി കറങ്ങി
നടക്കുന്നതിനാലാണ് ഇവൾക്ക് വിലാസിനി എന്ന പേരുവന്നത്

ദശകൂപസമോ വാപി...

2010-11-14T22:35:00.000+05:30

ഒരിക്കലും ജലക്ഷാമം അനുഭവപ്പെടാതിരുന്ന ഒരു നാടായിരുന്നു നമ്മുടേത്... അതിൽ ഒരു മുഖ്യ പങ്ക് കുളങ്ങൾ വഹിച്ചിരുന്നു...വലിയ പറമ്പുകൾ, വയലോരങ്ങൾ ,ക്ഷേത്രങ്ങൾ തുടങ്ങിയ ഇടങ്ങളിൽ വിശ്വാസങ്ങളുടെ ഭാഗമായി നിലനിർത്തിയിരുന്ന കാവും കുളവും ശാസ്ത്രീയമായ ശുദ്ധജലസംഭരണികളായിരുന്നു. പെയ്യുന്ന മഴവെള്ളത്തിന്റെ 90%വും സംഭരിച്ച് , കാവ് കുളങ്ങളിൽ വർഷം മുഴുവൻ ജലമേകി..ഈ ജലംതന്നെ വയലിൽ നൂറുമേനിയായി വിളയാൻ സഹായിച്ചു...ഇന്ന് കാവുകളൊക്കെ വെട്ടിമാറ്റി,കുളങ്ങളൊക്കെ നികത്തി പുത്തൻ വികസനങ്ങൾ അരങ്ങേറിക്കൊണ്ടിരിക്കുമ്പോൾ,നഷ്ടമായിക്കൊണ്ടിരിക്കുന്നത് കുടിവെള്ളവും അന്നവുമാണ് ; ഒപ്പം നമ്മോടൊപ്പം ജീവിക്കാൻ അവകാശമുള്ള , നമ്മുടെ ജീവന് താങ്ങാവുന്ന ഒരുപാട് ജീവികൾക്ക് ആ‍വാസവും നഷ്ടമാകുന്നു....

പുലരിവന്നു വിളിച്ചനേരം...

2010-11-07T22:19:00.000+05:30

വയനാടൻ കാട് മൂടൽമഞ്ഞിന്റെ നേത്ത പട്ടുകമ്പളവും പുതച്ച് ഉറങ്ങുകയായിരുന്നു...പുലർകാലസൂര്യൻ വന്നുവിളിച്ചപ്പോൾ മെല്ലെ പുതപ്പുനീക്കി എണീക്കാനൊരുങ്ങുന്ന കാനനസുന്ദരി...

വള്ളിയതിരാണി...

2010-11-02T21:55:00.001+05:30

അതിരാണിപ്പാടത്തെപ്പറ്റി എഴുതിയ പൊറ്റെക്കാട്...ഒരു ജലസൂചകമാണീ ചെടി.ഇതു വളരുന്നയിടത്ത് വെള്ളം ഉണ്ടായിരിക്കും...വെള്ളത്തിലെ വിഷമാലിന്യങ്ങൾ വലിച്ചെടുത്ത് ജലം ശുദ്ധീകരിക്കുകയും ചെയ്യുന്നു..

അതിരാണി പലയിനങ്ങളുണ്ട്...കുറ്റിച്ചെടിയായി വളരുന്ന സാധാരണ അതിരാണി,വളരെ ചെറിയ ചെടിയായി വളരുന്ന ചിറ്റതിരാണി,പിന്നെ വള്ളിയതിരാണി...ഇത് വീട്ടിലെ ചെടിച്ചട്ടിയിൽ പടർന്ന വള്ളിയതിരാണി...

ടോർച്ചടിച്ചതാര്.....

2010-10-29T21:11:00.002+05:30

കാ‍ട്ടുപാതയോരത്ത് ടോർച്ചടിച്ചതുപോലെ സൂര്യൻ പ്രഭാതകിരണങ്ങൾ വാരിത്തൂകിയപ്പോൾ...

അഭയം...

2010-10-18T22:20:00.000+05:30

ഉണങ്ങിക്കഴിഞ്ഞിട്ടും കാട്ടിലെയീ മരം കിളികൾക്ക് അഭയം നൽകുന്നു... ജീവിതമാകെയും പരോപകാരം ചെയ്ത് ,ഉണങ്ങിയാലും തണലായി ,പൊടിയും മുമ്പ് പിന്നെയും സൂക്ഷ്മജീവികൾക്ക് ആഹാരമായി, പിന്നെ മണ്ണിലെ വളമായി ജീവാംശമായിമാറി , കായിലും കനിയിലുകൂടി നമ്മുടെ ജീവനായി മാറുന്ന ജീവവൃക്ഷങ്ങൾ....

പൂച്ചക്കണ്ണുകൾ...

2010-10-16T16:10:00.001+05:30

ഇത് വെള്ളച്ചിയുടെ സുന്ദരൻ കണ്ണുകൾ..

നീലരത്നക്കല്ലുകൾ തന്നെ..

പൂച്ചക്കണ്ണുകൾ നിറങ്ങളിൽ ഒരുപാട് വൈവിദ്ധ്യം പുലർത്തുന്നവയാണ്....കുറച്ചു ചിത്രങ്ങൾ ഇതാ..വീട്ടിലെ പൂച്ചകളുടെ പുറകെ നടന്നിട്ട് കിട്ടിയതാ...

ഇതു സുന്ദരന്റെ കണ്ണുകൾ !!!

ഇത് ടിങ്കു എന്ന വികൃതിക്കുട്ടിയുടെ

മഞ്ഞയിൽ പച്ചക്കല്ലു പതിച്ച മഞ്ഞച്ചിയുടെ കണ്ണുകൾ...

ഇത് ചിന്നുക്കുട്ടീടെ സ്റ്റൈലൻ കണ്ണുകൾ...

ഇതെന്തു കിണാപ്പാ ഈശ്വരാ...എന്നെ കൊല്ലാനാണോ?..

ജൂനിയർ കുട്ടൂസൻ ഭയഭീതിയോടെ ക്യാമറ നോക്കുന്നു...

ഗ്ലാസ്സി ഐ...

ഒറ്റക്കണ്ണ്...

.മന്ദാരച്ചെപ്പുണ്ടോ....

2010-10-13T22:44:00.001+05:30

മന്ദാരപ്പുക്കൾ പലതരമുണ്ട്..മഞ്ഞയും പിങ്കും...ഇതിന്റെ ഇലകൾ ഒന്നാംതരം കാലിത്തീറ്റയാണെന്നു മാത്രമല്ല,വളരെ വേഗത്തിൽ മണ്ണിലലിഞ്ഞ് നൈട്രജനും നൽകുന്നു...മഞ്ഞമന്ദാരത്തിന്റെ ഇല ഉപ്പേരിയാക്കാം....പിങ്ക് മന്ദാരത്തെ കോവിദാരം എന്നാണ് വിളിക്കുക....

തുള്ളന്മാർ....

2010-10-09T23:07:00.001+05:30

ഇവൻ/ൾ പച്ചത്തുള്ളൻ. പുൽച്ചാടിയെ ഞങ്ങൾ ഇങ്ങനെ വിളിക്കാറുണ്ട്.ഇവർക്കൽ‌പ്പം പരിപാവനമായ ഒരു ഇമേജുണ്ട്.ലക്ഷിദേവി ഇവർക്കൊപ്പം എപ്പൊഴുമുണ്ടാകുമത്രെ..അതിനാൽ ദ്രോഹിക്കരുതെന്നും ഓടിക്കരുതെന്നുമൊക്കെ പ്രായമായവർ പറയാറുണ്ട്.മുസ്ലീം മതവിശ്വാസികളും ഇവനെ പള്ളിപ്പശു എന്നു വിളിച്ച് സംരക്ഷിച്ചിരുന്നു.. പക്ഷെ ഇന്ന് പുല്ലും പറമ്പിലെ മറ്റു പച്ചപ്പും ചെത്തിക്കോരി തീയിടുമ്പോൾ,വിഷം വാരിത്തുവുമ്പോൾ ഭൂമിയുടെ ഈ അവകാശി എവിടെപ്പോകും?...

ഒരുപാടിനം തുള്ളന്മാരുണ്ട്...പച്ചയും തവിട്ടും പുള്ളിയുള്ളവയും വലുപ്പമേറിയവയും കുഞ്ഞന്മാരും പരന്ന ചിറകുള്ളവരും ഇലപോലുള്ള ചിറകുള്ളവരുമൊക്കെ...കുറച്ചുപേരെ ഇതാ ഇവിടെ...

ഇലപ്രാണി...

2010-10-08T10:43:00.003+05:30

ഇലപോലെ ചിറകുള്ള ഈ വിരുതൻ ഇലകൾക്കിടയിലിരുന്നാൽ മറ്റൊരിലയാണെന്നേ തോന്നൂ.അതിനാൽ ഇരപിടിയന്മാരുടെ കണ്ണിൽ‌പ്പെടാതെ രക്ഷപ്പെടുന്നു..പച്ചില മാത്രമല്ല ഉണക്കിലപ്രാണിയുമുണ്ട്..ജന്തുലോകത്തെ വിസ്മയകരമായ അനുകരണങ്ങളിൽ ഒന്നാണിത്.സസ്യഭാഗങ്ങളെയും മറ്റു ജീവികളെയുമൊക്കെ സമർഥമായി രൂപഭാവാദികളിൽ അനുകരിച്ച് ഈ പാവങ്ങൾ ജീവരക്ഷ നേടുന്നു...

ഇവൻ ഞങ്ങളുടെ കമ്പ്യൂട്ടർ വയറിൽ വന്ന് ഇരിക്കുകയായിരുന്നു ...

ആകാശപൊന്നൂഞ്ഞാലിലാടാൻ...

2010-10-05T21:51:00.000+05:30

ഇതും വീടാണ്....

2010-10-01T19:38:00.000+05:30

തൃശൂർ എരയാംകുടിയിൽ നൂറുമേനി കൊയ്യുന്ന നെൽ‌പ്പാടങ്ങളെ ഇഷ്ടികക്കളങ്ങളാക്കി മാറ്റാൻ വേണ്ടി അന്യ സംസ്ഥാനങ്ങളിൽനിന്ന് തൊഴിലാളികളെ കൊണ്ടുവന്നപ്പോൾ അവർക്ക് താമസിക്കാനായി മുതലാളിമാർ ഒരുക്കിക്കൊടുത്ത വീടുകളാണിവ...അച്ഛനമ്മമാരും കുട്ടികളുമടങ്ങുന്ന ഒരു കുടുംബം മുഴുവൻ താമസിച്ചിരുന്നത് നായ്ക്കൂടു പോലുള്ള ഒരു കൊച്ചു മുറിക്കകത്തായിരുന്നു..അങ്ങനെ നിരനിരയായി ഒരുപാട് വീടുകൾ..അവിടെ അടിമകളെപ്പോലെ കഴിയാൻ കുറേ മനുഷ്യജന്മങ്ങളും...ഇങ്ങനേയും ഇവിടെ ഈ കേരളത്തിലും....ആർക്കൊക്കെയോ പണം വാരിക്കൂട്ടാൻ ഈ ജീവിതങ്ങൾ പൊലിഞ്ഞുതീരുന്നു...

കേളിപാത്രം...

2010-09-20T22:18:00.000+05:30

ഒരു മണിയും മുട്ടിക്കൊണ്ട് വായമൂടിക്കൊണ്ട് ഒരു ലോഹത്തകിടും കെട്ടി കണ്ണൂർജില്ലയുടെ വടക്കൻപ്രദേശങ്ങളിൽ കന്നിമാസമായാൽ കേളിപാത്രം വീടുകൾ തോറും കയറി ഭിക്ഷാടനം നടത്താറുണ്ടായിരുന്നു...വേഷം അഴിക്കുംവരെ മിണ്ടില്ല..കയ്യിൽ വലിയ ഒരു ഭിക്ഷാപാത്രം ഉണ്ടാകും ..ആളുകൾ പണവും അരിയും നൽകി അനുഗ്രഹം വാങ്ങും...ശിവൻ ഭ്രഹ്മഹത്യാപാപം തീരാനാണത്രെ ഇങ്ങനെ ഭിക്ഷതെണ്ടി നടക്കുന്നത്...ചോയി ജാതിയിൽ പെട്ടവർക്കാണ് ഈ വേഷം കെട്ടാൻ അനുമതിയുള്ളത്.

ഇന്ന് കേളിപാത്രങ്ങൾ നാട്ടിലിറങ്ങുന്നത് അപൂർവ്വമെങ്കിലും കുന്നുസംരക്ഷണസന്ദേശം പ്രചരിപ്പിക്കാനായി ശിൽ‌പ്പിയും ചിത്രകാരനുമായ സുരേന്ദ്രൻ കൂക്കാനം കണ്ണൂർ കലക്ടറേറ്റ് പരിസരത്ത് കേളിപാത്രം കെട്ടിയപ്പോൾ..

വാൽമീകം...

2010-09-17T22:19:00.000+05:30

മാ നിഷാദ....എന്നു പാടിയ ആ പഴയ കാട്ടാളന്റെ കഥയാണ് വാൽമീകങ്ങൾ കാണുമ്പോൾ ഓർമ്മവരിക...കാട്ടിലും നാട്ടിലും മണ്ണ ജീവനുള്ളതാകുമ്പോളാണ് വാൽമീകങ്ങൾ മുളച്ചുപൊന്തുക...ഇന്നിവ അപൂർവ്വങ്ങളാണ്,.കാരണം മണ്ണ് മരിച്ചുകൊണ്ടിരിക്കുകയാണ്.....വയനാട്ടിലെ തിരുനെല്ലിക്കാട്ടിൽനിന്ന് ഒരു ദൃശ്യം...

റോസ്....

2010-09-12T22:13:00.000+05:30

ഒരു ചെമ്പനീർ പൂ പറിച്ചു ഞാനോമലേ...

ഹരിണം....

2010-09-10T19:11:00.000+05:30

ആരാ വരുന്നേ?...

തട്ടേക്കാട് പക്ഷിസങ്കേതത്തിൽ നിന്നും ഒരു ദൃശ്യം...

ഓട്ടപ്പാത്രം.....

2010-09-07T21:32:00.001+05:30

കണ്ണൂർ ജില്ലയിലെ സുന്ദരവും ജൈവസമ്പന്നവുമായ ഒരു കുന്നാണ് കൊട്ടത്തലച്ചിമല .നിറയെ കരിങ്കല്ലുകൾ നിറഞ്ഞ ഈ മലയുടെ മറ്റൊരു പ്രത്യേകത വലിയൊരു ജലസംഭരണിയാണിത് എന്നതാണ്.. അപൂർവ്വസുന്ദരമായ ഈ മലനിരയ്ക്ക് ചിലർ പണക്കൊതിമൂത്ത് മരണമണി മുഴക്കിത്തുടങ്ങിയപ്പോൾ, തങ്ങളുടെ ജീവിതത്തിനും കുടിവെള്ളത്തിനും ഒരേയൊരാശ്രയമായ കൊട്ടത്തലച്ചിയെ രക്ഷിക്കാനുള്ള പ്രവർത്തനങ്ങളിൽ സഹായിക്കണമെന്ന് നാട്ടുകാർ ആവശ്യപ്പെട്ടതനുസരിച്ച് ചെന്നതായിരുന്നു ഞങ്ങൾ..ചെന്നപ്പോൾ കണ്ടതോ!...നൂറുനൂറു ദ്വാരങ്ങളിലൂടെ വെള്ളം ചോർന്നൊലിക്കുന്ന വമ്പനൊരു ഓട്ടപ്പാത്രം പോലെ നിൽക്കുന്ന ഒരൂക്കൻ മലയെ..ഈ ചോർന്നൊലിപ്പാണത്രെ അവിടത്തുകാരുടെകുടിവെള്ളമായി കിണറുകളിലെത്തുന്നത്..മാഫിയകൾ നൂറുകണക്കിനേക്കർ സ്ഥലം വാങ്ങിക്കൂട്ടുകയാണിവിടെ..വരാൻ പോകുന്നത് കരിങ്കൽ ക്വാറികളും ക്രഷറുകളും ...പിന്നെയും എന്തൊക്കെയോ വരാനിരിക്കുന്നു...സ്ഫോടനങ്ങൾ തുടങ്ങിക്കഴിഞ്ഞു..നാട്ടുകാർക്കാകുമോ തങ്ങളുടെ ജീവൻ നില നിർത്തുന്ന ഈ ജലസംഭരണി... ഈ ഓട്ടപ്പാത്രം കാത്തു രക്ഷിക്കാൻ....

സന്തുഷ്ടകുടുംബം...

2010-09-05T21:03:00.000+05:30

കർണ്ണാടക ഫോറസ്റ്റ് ക്വാർട്ടേർസിലെ [ചീക്കാട്] വനപാലകർ പോറ്റിവളർത്തുന്ന ഒരു കുടുംബം..!!!...

സല്ലാപം.....

2010-09-01T07:25:00.001+05:30

മേഘങ്ങൾ താഴ്ന്നുവന്ന് മലയോട് സല്ലപിക്കുകയാണ്.എന്തൊക്കെയാണവർ പറയുന്നത്?...മഴമേഘങ്ങളും തണുത്തകാറ്റും കോടയുമൊക്കെ നിറഞ്ഞയൊരു സായാഹ്നത്തിൽനിന്നും ഒപ്പിയെടുത്ത ഒരു ദൃശ്യം.. കണ്ണൂർ പുളിങ്ങോമിനടുത്ത കൊട്ടത്തലച്ചിമലയുടെ മുകളിൽ നിന്നും നോക്കിയാൽ കിഴക്കുഭാഗത്തുകാണുന്നതാണ് ഈ ദൃശ്യസൌന്ദര്യം....

കൊച്ചുമാവേലിയും കൂട്ടുകാരും.

2010-08-27T12:41:00.000+05:30

ഓണത്തിന് നാടുകാണാനും പിന്നെ ചെലവിനിത്തിരി കാശിനുമിറങ്ങിയ കൊച്ചുമാവേലിയും കൂട്ടുകാരും...

ഓണാശംസകൾ....

2010-08-22T22:09:00.000+05:30

വറുതിയുടെ ഈ പൊന്നോണക്കാലത്ത് കള്ളവും ചതിയും സ്വാർഥതയുമൊക്കെ നാടുവാഴുമ്പോൾ ,അരി തരേണ്ട വയലുകളൊക്കെ കോൺക്രീറ്റ് സൌധങ്ങളായി മാറ്റി 20-30 രൂപയ്ക്ക് അരി വാങ്ങേണ്ട അവസ്ഥയിൽ മലയാളി എത്തിനിൽക്കുമ്പോൾ,പ്രതീക്ഷിക്കാൻ ഒന്നുമില്ലെങ്കിലും,ഓണവും വെറുമൊരു ചന്തഓണമായി ,നന്മയുടെ നറുമണം തീരെയില്ലാത്ത മനം മടുപ്പിക്കുന്ന കൺസ്യൂമർ മേളയായി മാറിക്കഴിഞ്ഞിരിക്കുമ്പോഴും,....ഒരു കുഞ്ഞു തുമ്പപ്പൂവിൻ ചിരിയിൽ മനസ്സു നിറയുന്ന, നന്മ വറ്റാത്ത മനസ്സുകൾക്കു മാത്രം ഇന്നും ഓണസമൃദ്ധി നഷ്ടപ്പെടില്ല...എല്ലാവർക്കും സ്നേഹം നിറഞ്ഞ ഓണാശംസകൾ....

ഇതൊക്കെ GHSS Periye യിലെ കുട്ടികൾ ഓണാഘോഷത്തിന്റെ ഭാഗമായി ഇട്ട പൂക്കളങ്ങൾ’‘’

മലയാളിയുടെ ജീവിതത്തിൽ നിന്നുമീ പുഷ്പോത്സവം ഒരിക്കലും മരിക്കാതിരിക്കട്ടെ...

നവാബ്..

2010-08-21T10:37:00.000+05:30

ഒരു നവാബിന്റെ ഗമയുള്ള ഈ അപൂർവ്വ ചിത്രശലഭത്തെ വയനാട്ടിലെ ചെതലയം ഫോറസ്റ്റ് ഓഫീസിനടുത്തു നിന്ന് ലഭിച്ചതാണ്..വലക്കൂണിൽനിന്ന് രസമൂറ്റിക്കുടിക്കുകയാണിഷ്ടൻ...പൂമ്പാറ്റകൾ ചില സസ്യങ്ങളൂടെ രസവും ,മണ്ണീൽനിന്നും ഉപ്പുരസവും ,പക്ഷികളുടെയും മറ്റും കാഷ്ഠങ്ങളിൽനിന്നും ലവണങ്ങളും വലിച്ചു കുടിക്കാറുണ്ട്...ലൈംഗിക ഹോർമോണുകളുടെ ഉത്പാദനത്തിനു വേണ്ടിയാണിങ്ങനെ ചെയ്യുന്നത്...

പൊന്നാമ്പൽ പുഴയിറമ്പിൽ നമ്മൾ...

2010-08-16T22:32:00.000+05:30

രാത്രിയാണ്,ചന്ദ്രനുദിക്കുമ്പോഴാണ് ആമ്പൽ വിരിയുക, അതിനാൽ കവികൾ ചന്ദ്രന്റെ കാമുകിയായി ഇവയെ സങ്കൽ‌പ്പിക്കുന്നു....ഒരുപാടിനം ആമ്പലുകളുണ്ട്... വെള്ള പൂക്കളുള്ള നാടൻ ആമ്പലിനെ ഞങ്ങൾ പൂത്താലി എന്ന് വിളിക്കാറുണ്ട്,ഇതുകൊണ്ട് ബാല്യത്തിൽ മാലയുണ്ടാക്കി കളിക്കാറുണ്ട്..ജലാശയങ്ങളിൽനിന്ന് വിഷമാലിന്യങ്ങൾ നീക്കംചെയ്യാൻ ഇവ സഹായിക്കുന്നു...

പുത്താലി...ഇതിന്റെ വിത്ത് ഭക്ഷിക്കാം.

കരിന്തേൾ

2010-08-14T21:40:00.000+05:30

തേളിനെ കണ്ടവരുണ്ടോ?....കുട്ടിക്കാലത്ത് തേൾ ഒരു ഭീകരജീവിയായിരുന്നു...കണ്ടാൽ പേടിച്ചോടും..അതിനിടക്കാണ് അമ്മത്തേളിനെ നിരീക്ഷണത്തിനായി തീപ്പെട്ടിയിലാക്കിയ ജെറാൾഡ് ഡ്യൂറൽ എന്ന മിടുക്കൻ കുട്ടിയെപറ്റി കേട്ടത്...ഇവർ വെറും പാവങ്ങളാണെന്ന് അതോടെ മനസ്സിലായി...മുമ്പെങ്ങോ കുഞ്ഞുങ്ങളെയും പുറത്തുകയറ്റി നടക്കുന്ന അമ്മത്തേളിനെ കാണാൻ പറ്റിയിരുന്നു...ഇന്നതും ഒരപൂർവ്വ കാഴ്ച...ഇവരും നല്ല കീടനാശിനികളാണ്,കേട്ടോ...ഞങ്ങളുടെ മുറ്റത്തു വന്നതാണീ ഉശിരൻ കരിന്തേൾ...

കുത്താൻ ഞാൻ റെഡി..നിങ്ങളോ...

ബലൂൺ വേണോ...?

2010-08-03T22:06:00.000+05:30

ഈ ബലൂൺകാരൻ ഇലകളിൽ കയറിയിരുന്ന് മഴക്കാല സന്ധ്യകളിൽ പാടുന്ന ഒരു കൊച്ചു വിരുതനാണ്.ഇട്ട്രീ...ഇട്ട്രീരീ,,, എന്നൊക്കെ പാടുന്ന ഇവൻ ഇട്ടിച്ചിരിയെ വിളിക്കുന്നതും നോക്കി ഒരു ദിവസം സന്ധ്യയ്ക്ക് ടോർച്ചുമേടുത്ത് അന്വേഷിച്ചപ്പോൾ ഇവനുണ്ട് ഒരു ഇലയിലിരുന്ന് ബലൂൺ വീ ർപ്പിക്കുന്നു..!

ചൂത്....

2010-08-01T21:33:00.000+05:30

പാറകളിലും വയലുകളിലും വളരുന്ന ഒരു ഏകവർഷി സസ്യമാണ് ചൂത്. ചൂതു മാച്ചി[ചൂല്]ഉണ്ടാക്കുന്ന ഒരടിയിലേറെ വലുപ്പമുള്ളത് മുതൽ തീരെ ചെറുതു വരെ പലയിനം ചൂതുകൾ ഉണ്ട്.വീടുകളിലെ പൂജാമുറികൾ,അമ്പലങ്ങൾ എന്നിവ വൃത്തിയാക്കാൻ മലയാളി ചൂതുമാച്ചി ഉപയോഗിച്ചു...ഇന്നും പലരും ഉപയോഗിക്കുന്നുണ്ട്.മുമ്പൊരിക്കൽ മാടായിക്കാവിൽ ചെന്നപ്പോൾ 50 രൂപ കൊടുത്ത് ഒരു മാച്ചി വാങ്ങി. പൊടി ഇളകിപ്പറക്കാതെ മൃദുവായ ഈ മാച്ചികൊണ്ട് വൃത്തിയായി അടിച്ചുവാരാമെന്നതിനാൽ ഞങ്ങൾ ബെഡ് റൂം വൃത്തിയാക്കാൻ ഇതുപയോഗിക്കുന്നു...

കണ്ണൂർ ജില്ലയിലെ കണ്ണപുരം ഭാഗത്ത് ചൂതുമാച്ചിയുണ്ടാക്കുന്നവർ ഇപ്പോഴുമുണ്ട്.വലിയ ചൂത് കിട്ടാൻ വളരെ പ്രയാസമാണത്രെ ഇപ്പോൾ..പാറകളുടെ നാശവും ഇതുണ്ടാക്കുന്ന ആൾക്കാരുടെ കുറവും ഉപയോഗിക്കുന്നവരുടെ കുറവുമൊക്കെ ഈ മാച്ചിയെ ഇല്ലാതാക്കിക്കൊണ്ടീരിക്കുന്നു...

കരിങ്കുറിഞ്ഞി...

2010-07-29T07:57:00.000+05:30

പുഷ്പിക്കുന്ന കാലയളവിന്റെ ദൈർഘ്യവും പൂവിന്റെ നിറവും അടിസ്ഥാനമാക്കി നിരവധിയിനം കരിങ്കുറിഞ്ഞികളുണ്ട്.
കുടുംബം അക്കാന്തേസീ.
ശാ.നാമം 1.സ്ട്രോബിലാന്തസ് ഹെയ്നിയാനസ്.
2.സ്ട്രോബിലാന്തസ് കുന്തിയാനസ്.
സംസ്കൃതനാമം സഹചര.ഏകദേശം 180 സെ.മീ.വരെ ഉയരം വയ്ക്കുന്ന വനസസ്യങ്ങൾ. നാട്ടിലും വളരും.പൂക്കൾ നീല പർപ്പിൾ മഞ്ഞ തുടങ്ങിയ ഇനങ്ങൾ..ഇലയുടെ ഞരമ്പുകൾ മുകളിലേയ്ക്ക് ഉയർന്നു നിൽക്കുന്നവയാണ്...
വാതരോഗങ്ങൾ ശമിപ്പിക്കും.രക്തം ശുദ്ധീകരിക്കും.ചൊറി.ചിരങ്ങ്,വ്രണങ്ങൾ എന്നിവ ശമിപ്പിക്കും. വാജീകാരിയാണ്.സ്വരസം കുടിക്കുന്നതും ഇല ലേപനം ചെയ്യുന്നതും ചൊറി,കുഷ്ഠം എന്നിവയ്ക്ക്.ഇല അരച്ച് പല്ലിന്റെ ദ്വാരത്തിൽ വച്ചാൽ വേദന ശമിക്കും.പ്രമേഹത്തിന് സ്വരസം 10 മി.ലി. വീതം രണ്ടുനേരം കുടിക്കുന്നത് നല്ലത്.ഇല അരച്ച് പുരട്ടുന്നതും സമൂലം കഷായമാക്കുന്നതും വാതത്തിന്.

ഭംഗിയുള്ള കുറ്റിച്ചെടിയാണ്.മനോഹരമായ പൂക്കൾ .ഉദ്യാന സസ്യമാക്കാം. പശുവിന് ഇഷ്ടമാണ്.പച്ചില വളവുമാക്കാം.വേലിയ്ക്കൽ നടാം...

കാന്താരി...

2010-07-24T21:24:00.000+05:30

ഇത് ഗാന്ധാരദേശത്തു നിന്നും വന്ന് നമ്മുടെ കറികൾക്കും പലഹാരങ്ങൾക്കും രുചിയും മണവും ഗുണവും വർദ്ധിപ്പിക്കുന്ന സുന്ദരിക്കുട്ടി...ചില സുഹൃത്തുക്കൾക്ക് ഒരു കാന്താരിയും ഒരു കട്ട ഉപ്പും മതി ഒരു കിണ്ണം കഞ്ഞി കുടിക്കാൻ. കാന്താരി ചതച്ചു ചേർത്ത ചമ്മന്തിയുടെ ഒരു സ്വാദേ..[വായിൽ കപ്പലോടിക്കാം..]ചുവന്ന മുളകിനു പകരം കറികളിൽ ചേർക്കാം..കൊളസ്റ്റ്രോൾ കുറയ്ക്കുമെന്നും പറഞ്ഞുകേൾക്കുന്നുണ്ട് .എന്നുവച്ച് എരിവ് അധികമായാൽ അത്ര നന്നല്ല കേട്ടോ,കുടലിൽ വ്രണങ്ങളും അസിഡിറ്റിയും മലബന്ധവും മറ്റുമുണ്ടാക്കും...

കടിക്കല്ലേ...

കിളികളുടെ ഇഷ്ട ഭക്ഷണം കൂടിയാണ്.ബുൾബുൾ, കുയിൽ,കുട്ടുറുവൻ തുടങ്ങിയവർ കാന്താരിയുടെ വിരുന്നുകാരാണ്....

കാന്താരിപ്പൂവ്.

ഇതിന്റെ അധികം മൂക്കാത്ത ഇലകൾ അരിഞ്ഞ് ഉപ്പേരിയാ‍ക്കാം...മൂക്കാത്ത കാന്താരിയും ഉപ്പേരിയാക്കാം..ധാരാളം ഫൈബറുകൾ,പ്രോട്ടീൻ, വിറ്റാമിനുകൾ തുടങ്ങിയവയൊക്കെയുണ്ട്...

ജ്വാല....

2010-07-24T06:23:00.000+05:30

പൂച്ചവാൽ പൂവിൽ പ്രഭാതസൂര്യൻ ചെന്തീക്കതിരുകളാൽ തിളക്കമേകിയപ്പോൾ....

നട കാളേ നട നട....

2010-07-17T23:12:00.000+05:30

തോളത്തു കനം തൂങ്ങും വണ്ടിതൻ തണ്ടും പേറി....മറഞ്ഞുപോയിത്തുടങ്ങിയ ഈ കാഴ്ച പ്ലാച്ചിമടയിൽ നിന്ന്...

ഒളിഞ്ഞും തെളിഞ്ഞും....

2010-07-13T21:57:00.000+05:30

ഇത് തൃശൂർ ചാലക്കുടിയിലെ ആതിരപ്പള്ളി ജലപാതത്തിന്റെ ഒരു ഒളിഞ്ഞു നോട്ടം....

തെളിഞ്ഞുനോട്ടം

വിദൂരദൃശ്യം

ഈ സൌന്ദര്യം ഇനി എത്ര നാൾ...മനുഷ്യന്റെ വിവേകരഹിതമായ വികസനചിന്തകളിൽ പ്പെട്ട് മരണമണിയും കാത്ത് കിടക്കുകയാണ് ഈ അപൂർവ്വ സൌന്ദര്യം...നമ്മുടെ ധൂർത്തുകൾ ഒഴിവാക്കി, വൈദ്യുതിക്കായി പാരമ്പര്യേതരമാർഗ്ഗങ്ങൾ സ്വീകരിച്ച് നമുക്കീ അപൂർവ്വചാരുതയെയും അവശേഷിച്ച ഇത്തിരി പച്ചപ്പിനേയും,ഒരുപാട് ജീവജാലങ്ങളെയും ഒപ്പം നമ്മളെയും രക്ഷിച്ചുകൂടെ.....

മൂട്ടിൽ‌പ്പൂവ്....

2010-07-10T22:12:00.000+05:30

ഈ കാനന സുന്ദരിയെ കണ്ടിട്ടുണ്ടോ?..മൂട്ടീൽ‌പ്പഴമരത്തിന്റെ കൊമ്പിലൊ ശാഖാഗ്രത്തിലോ അല്ല തടിയുടെ മൂട്ടിലാണ് പൂവും കായും ഉണ്ടാകുക..തടി നിറയെ പിങ്കു പൂക്കളുമായി ഈ മരം നിൽക്കുന്നതു കാണാൻ നല്ല ഭംഗിയാണ്

പൊയ്കയിൽ മുഖംനോക്കി....

2010-07-09T22:48:00.001+05:30

പൊയ്കയിൽ...നീർപ്പൊയ്കയിൽ..
മുഖം നോക്കി നോക്കി....നീയെത്രസുന്ദരി ഘനശ്യാമയാം കാനനസുന്ദരീ...
തട്ടേക്കാട് വനംവകുപ്പ് ഡോർമിറ്ററിക്കരികിൽനിന്നും ഒരു ദൃശ്യം...

മേന്തോന്നി [ഗ്ഗ്ലൊരിയൊസ്സ]...

2010-07-07T21:48:00.000+05:30

ശാ.നാമം‌-ഗ്ലോറിയോസ സുപെർബ .കുടുംബം ലില്ലിയേസീ.
മനോഹരമായ പൂക്കളോടു കൂടിയ ഈ വള്ളിച്ചെടി ഒരു വിഷച്ചെടിയാണ്.ഇലകളുടെ അഗ്രം നാരുപോലെ [tendrils]രൂപന്തരപ്പെട്ട് പടർന്നുവളരാൻ സഹായിക്കുന്നു.പൂക്കാലം വർണ്ണമനോഹരമാണ്.മൊട്ടുകൾ പച്ച കലർന്ന മഞ്ഞയിൽ തുടങ്ങി ക്രമേണ സ്വർണ്ണ മഞ്ഞയായി ,വിടരുമ്പോൾ മഞ്ഞയും പച്ചയുംനിറമുള്ളതായി മാറുന്നു.വിരിയുമ്പോൾ ഓരോ ദിവസവും നിറത്തിൽ മാറ്റങ്ങൾ ഉണ്ടായിക്കൊണ്ടിരിക്കും.മഞ്ഞ കുറഞ്ഞ് കുറഞ്ഞ് ചുവപ്പായിക്കൊണ്ടിരിക്കും....
പൂവിനും കിഴങ്ങിനും വിഷമുണ്ട്. തിന്നാൽ ചത്തുപോകും.എന്നാൽ കിഴങ്ങ് സംസ്കരിച്ച് അമൂല്യമായ മരുന്നുണ്ടാക്കാറുണ്ട്.പണ്ട് പ്രസവങ്ങൾ ആശുപത്രികളിൽ എത്താതിരുന്ന കാലത്ത് നാടൻ പതിച്ചികൾ ഇത് ഉപയോഗിച്ചിരുന്നു.ഇതിനു വടക്കോട്ടും കിഴക്കോട്ടും വളരുന്ന രണ്ടു കിഴങ്ങുകളാണുണ്ടാവുക.ഇതിൽ ഒന്നുപയോഗിച്ചുണ്ടാക്കുന്ന മരുന്നിന് കുട്ടിയെ എളുപ്പത്തിൽ ഗർഭാശയത്തിൽ നിന്ന് പുറത്തെത്തിക്കാനും മറ്റെതിന് കുട്ടിയെ പുറത്തുവരാതെ പിടിച്ചു നിർത്താനും കഴിവുണ്ടത്രെ!!!...പലരും ഗർഭഛിദ്രത്തിന് ഇത് ഉപയോഗിക്കാറുണ്ട്.1 ഗ്രാം മേന്തോന്നിക്കിഴങ്ങ് അരച്ചുകുടിച്ചാൽ 3 മാസം വരെയുള്ള ഗർഭം അലസിപ്പോകുമത്രെ. എങ്കിലും അമിതരക്തസ്രാവവവും അപകടവും സംഭവിക്കാം.

ഇല ചതച്ചു പിഴിഞ്ഞ നീര് പേൻ നാശിനിയാണ്.

മണവാട്ടിയും കാട്ടുമണവാട്ടിയും...

2010-07-05T21:07:00.001+05:30

ഇത് മണവാട്ടിത്തവള.[ റാണാ മലബാറിക്ക ].പട്ടുചേലയും ചുറ്റി സുന്ദരിയായി പടിഞ്ഞാറ്റമുറിയിൽ കയറി ഇരിക്കുന്നതിനാലാണ് ഇവൾക്ക് മണവാട്ടി എന്ന് പേർ വന്നത്. മലബാറിൽ ഒരു കാലത്ത് സർവ്വസാധാരണമായി ഇവളെ കണ്ടിരുന്നു.കുട്ടിക്കാലത്ത് പടിഞ്ഞാറ്റയിൽ പത്തും ഇരുപതുമൊക്കെ മണവാട്ടിമാരെ കണ്ടിരുന്നു.മഴ വരുമ്പോളുള്ള ,അന്നൊക്കെ കർണ്ണകഠോരമായി തോന്നിയിരുന്ന[ഇന്ന് കൊതിയാണ് തവളഭാഗവതർമാരുടെ പാട്ട് കേൾക്കാൻ...]കൂട്ടപ്പാട്ട് സഹിക്കാനാകാതെയും, കിണ്ടിയെ ഇവളുമാർ ടോയ്ലറ്റാക്കി വൃത്തികേടാക്കുന്നതിനാലും അന്നൊക്കെ ഇവരെ സഞ്ചിയിൽ പിടിച്ചിട്ട് റോഡിനപ്പുറത്തേക്ക് നാടുകടത്തി നോക്കുമായിരുന്നു.പിറ്റേന്ന് നോക്കുമ്പോൾ ഇവളുമാർ പടിഞ്ഞാറ്റയിൽ ഹാജരുണ്ടാകും..ഇന്നും കരിവെള്ളൂരിലെ അടുക്കളയിലും കുളിമുറിയിലുമൊക്കെയായി നാലഞ്ച് മണവാട്ടിമാർ കഴിയുന്നുണ്ട്.

ഇവൻ സുന്ദരനല്ലേ...?

മണവാട്ടിയുടെ അടുത്ത ബന്ധുവാണ് കാട്ടുമണവാട്ടി.അത്ര നിറപ്പകിട്ടില്ലാത്ത ഇവരെ കാടുകൾ ,കാടുപിടിച്ച പറമ്പുകൾ,ചതുപ്പുകൾ വയലുകൾ തുടങ്ങിയ സ്ഥലങ്ങളിലൊക്കെ കാണാം.നനവിൽ ഇവ ധാരാളമുണ്ട്.ഒരുത്തനെ പിന്തുടർന്ന് നല്ലൊരു ഷോട്ട് എടുക്കാൻ ശ്രമിച്ചപ്പോൾ കിട്ടിയ ചില ചിത്രങ്ങൾ..

ഹോ..നാശം .കുറേ നേരമായി ഇവൾ എന്റെ പിന്നാലെ വായിൽനോക്കി നടക്കാൻ തുടങ്ങിയിട്ട്.. ഒന്നു കൂട്ടുകാരിയെ പാടിമയക്കാനും സമ്മതിക്കില്ലെ.ഈ മിന്നലടിക്കുന്ന കുന്തവും കൊണ്ട് ഒന്നു പോയാട്ടെ..

കല്ലിന്മേൽ കയറിയിരുന്നാലോ...

ഈ പോസ് കൊള്ളാമോ?...

ഇവൾ പോകുന്ന ലക്ഷണമില്ലല്ലോ..ഇലയിൽ കയറി ഇരുന്നാലൊ..ഹോ..അതും പിടിച്ചോ!!!...

മരത്തിൽ കയറി രക്ഷപ്പെടാം..

കരിങ്ങോട്ട...

2010-07-04T15:57:00.000+05:30

ശാ.നാമം-സമാഡെര ഇൻഡിക്ക.കുടുംബം സൈമാറുബേസീ.8 മീറ്റർവരെ ഉയരം വയ്ക്കുന്ന ചെറുവൃക്ഷം.അൽ‌പ്പം കറുപ്പുഛായയുള്ള തടിയും ഇലയും ആയതിനാൽ കരിങ്ങോട്ട എന്നു പേർ.
വാതരോഗമരുന്നാണ് കരിങ്ങോട്ട തൈലം.തൈലം പുരട്ടിയാൽ വാതവേദനയും നീർവീക്കവും ശമിക്കും.പനിക്ക് ഇതിന്റെ തൊലിയും ചുക്കും കുരുമുളകും ചേത്ത് കഷായം ഉണ്ടാക്കാം.തടിയുടെ കാതലിൽ നിന്നെടുക്കുന്ന സത്ത് ശരീരശക്തി പ്രദാനം ചെയ്യുന്നതാണ്.വിത്ത് മാലയായി കഴുത്തിലിട്ടാൽ ആസ്മ, നെഞ്ചുവേദന ഇവ മാറും.
സോമാഡെറിൻ എന്ന ഒരു ഗ്ലൂക്കൊസൈഡ് ഇതിലുണ്ട് .തൊലിയിൽ ടെക്സാസ്റ്റെറോൾ,സ്റ്റിഗ്മാസ്റ്റെറോൾ എന്നീ രാസഘടകങ്ങൾ ഉണ്ട്.മൊത്തം കൈപ്പു രസമാണിതിന്.

കുടപ്പന...

2010-06-29T21:23:00.001+05:30

പണ്ട് ശീലക്കുടകൾ വരുന്നതിനു മുമ്പ് ആൾക്കാ‍ർ ഇതിന്റെ ഇലകൊണ്ടുണ്ടാക്കിയ കുടയാണ് ഉപയോഗിച്ചിരുന്നത്.പണക്കാർ മാത്രമാണേ..പാവങ്ങൾ വാഴയില,ചേമ്പില തുടങ്ങിയവ കൊണ്ടാണ് മഴയെ പ്രതിരോധിച്ചിരുന്നത്...കുട കെട്ടാൻ പൂക്കണിയാൻ എന്ന ഒരു വിഭാഗം ആൾക്കാരും ഉണ്ടായിരുന്നത്രേ...പലയിനം കുടകൾ ഉണ്ട്.കൃഷിക്കാരിൽ ആണുങ്ങൾ ഉപയോഗിക്കുന്ന കാലില്ലാത്ത തൊപ്പിക്കുടയും പെണ്ണുങ്ങൾ ഉപയോഗിച്ചിരുന്ന വലിയ കളക്കുടയും,കുട്ടികൾക്കായി കുഞ്ഞിക്കുടകൾ,അമ്പലങ്ങളിലേയ്ക്ക് ആചാരക്കുടകൾ ,അലങ്കാരക്കുടകൾ.....തുടങ്ങിയവ.
ഇതിന്റെ ഇല ഉണക്കി സംസ്കരിച്ച് താളിയോലയുമുണ്ടാക്കിയപ്പോൾ പണ്ട് മലയാളിയുടെ ജീവിതത്തിൽ കുടപ്പനയ്ക്ക് നല്ല ഒരു സ്ഥാനം ഉണ്ടായിരുന്നു..ഇന്ന് നാലും അഞ്ചും മടക്കുള്ള കുടകളുടെ കാലത്ത് ആർക്കുവേണം ഓലക്കുടയും കുടപ്പനയും...

കുടപ്പനയുടെ ഈ പൂക്കാഴ്ച കിട്ടിയത് കേരള-കർണ്ണാടക അതിർത്തിയിലുള്ള ചീക്കാട് എന്ന സ്ഥലത്തുനിന്നാണ്...

ഈന്ത്...

2010-06-27T11:26:00.000+05:30

5-8 മീറ്റർ വരെ പൊക്കം വയ്ക്കുന്ന ഒറ്റത്തടിവൃക്ഷം.സൈക്കസ് സിർസിനാലിസ് ലിൻ എന്ന ശാസ്ത്രനാമമുള്ള ഈന്ത് ഒരു അനാവൃതബീജസസ്യമാണ്[angeosperm].പന്നൽച്ചെടികളുടെ ഇലകൾ പോലുള്ള ഇതിന്റെ ഇലകൾ അലങ്കാരങ്ങൾക്ക് ഉപയോഗിക്കാറുണ്ട്.ആൺ-പെൺ വൃക്ഷങ്ങൾ വെവ്വേറെകാണപ്പെടുന്നു..ഇളം മഞ്ഞകായ്കൾ...

പ്രാചീന സസ്യമായ ഈന്തിന്റെ കായയിലെ അന്നജം അതിവിശിഷ്ടമാണ്.ഇതു കൊല്ലത്തിൽ ഒരിക്കലെങ്കിലും കഴിച്ചാൽ മറ്റൊന്നിൽനിന്നും ലഭിക്കാത്ത പോഷകങ്ങൾ ലഭിക്കും.അത്ര മെല്ലെ വളരുന്ന സസ്യമായതിനാലാണ് ഈ വൈശിഷ്ട്യം.. ഗിരിവർഗ്ഗക്കാർ ക്ഷാമകാലത്ത് ഇതു ഭക്ഷിക്കുന്നു.ഇതിന്റെ തളിരിലയുടെ ചാറ് ഛർദ്ദി ശമിപ്പിക്കും.
ഈന്ത് കായ്ച്ചു കാണണമെങ്കിൽ ഏറെ വർഷങ്ങൾ കാത്തിരിക്കേണ്ടിവരും..കണ്ണൂർ ജില്ലയിലെ മക്രേരി അമ്പലക്കുളക്കരയിൽ രണ്ടുവർഷം മുമ്പ് ഈന്ത് കുലച്ചപ്പോൾ...

കണ്ണാന്തളിയും.....

2010-06-26T07:42:00.000+05:30

കണ്ണാന്തളീയും കാട്ടുകുറിഞ്ഞിയും കണ്ണാടി നോക്കുന്ന ചോലകൾ ഇന്ന് അപൂർവ്വമായിക്കൊണ്ടിരിക്കുകയാണ്... ഇതിന് എക്സാക്കം ബൈക്കളർ എന്നു ശാസ്ത്രനാമം വരാൻ കാരണം പൂവിതളുകൾക്ക് രണ്ട് നിറങ്ങൾ ഉള്ളതാണ്. ഇടനാടൻ ചെങ്കൽക്കുന്നുകളിൽമാത്രം കാണപ്പെടുന്ന ഈ സുന്ദരിപ്പൂവ് കുന്നുകൾക്കൊപ്പം ഇല്ലാതായിക്കൊണ്ടിരിക്കുകയാണ്...ഓണപ്പാട്ടുകളിൽ നിറഞ്ഞുനിന്നിരുന്ന ഇത് ഓർമ്മ മാത്രമായിത്തീരാൻ അല്പകാലം കൂടി മാത്രം....

കണ്ണാന്തളിമുറ്റം...മുറ്റത്തൊരു തുമ്പ....

ഊട്ടി ആപ്പിൾ!!!...

2010-06-23T21:28:00.000+05:30

ഇത് ഒരിനം ചെറിയാണ്...നനവിൽ കിളികൾക്കു ഭക്ഷണമായിത്തീരുന്ന ഈ പഴത്തിന് അല്പം പുളിരസമാണ്.അച്ചാറിടാം പഴവും തിന്നാം..

തിരനോട്ടം......

2010-06-21T05:27:00.000+05:30

മറ്റൊരു പകലിന്റെ മഹാകഥയും ആടാനൊരുങ്ങുംമുമ്പ് ആ മഹാനടനാമാദിത്യൻ വൃക്ഷങ്ങളുടെ തിരശ്ശീലയ്ക്കപ്പുറത്തുനിന്ന് മേഘപാളികളെ സാക്ഷിയാക്കിക്കൊണ്ട് തിരനോക്കുകയാണ്....കണ്ണൂർ റെയിൽവേ സ്റ്റേഷനിലെ ഒരു പുലരി.....

മുത്തുമണികൾ.....

2010-06-19T06:31:00.002+05:30

രാവിലെ മഴമുത്തുകളെ നോക്കാൻ പോയപ്പോൾ കിട്ടിയതാ ഈ മുത്തുമണികൾ...പച്ചിലപ്പരപ്പിൽ സൂര്യൻ നവരത്നങ്ങൾ തീർക്കുമ്പോഴുണ്ടാകുന്ന സൌന്ദര്യം നോക്കിനിൽക്കാൻ കൊതിക്കാത്തവരുണ്ടോ !.....

കഠാരമുനകൾ.....

2010-06-16T05:45:00.000+05:30

ചെറുപ്പത്തിൽ ചൂരൽക്കഷായത്തിന്റെ ചൂടറിഞ്ഞിട്ടുണ്ടോ?...ചൂരൽ കത്തിമുനകൾപോലുള്ള ഈ മുള്ളുകൾ അലങ്കാരമാക്കിയിരിക്കുന്നതു പക്ഷെ ,സ്വരക്ഷയ്ക്കുവേണ്ടിമാത്രമാണേ..

പനി വരുന്ന വഴികൾ...

2010-06-13T07:28:00.000+05:30

എന്താ ചെയ്ക...ഈ മനുഷ്യർ ചെയ്യുന്ന ഓരോ വൃത്തികേടുകൾ കണ്ടില്ലേ...ഇതൊരു ആസ്പത്രിക്കാർ ചെയ്ത പണിയാ .കച്ചറകളത്രയും പൊതുസ്ഥലത്തിട്ട് ആൾക്കാരിൽ രോഗം പരത്തി...എന്താ പറയാ..പൊതുസ്ഥലങ്ങൾ ഞങ്ങൾ മിണ്ടാപ്രാണികൾക്കും കൂടിയുള്ളതാണെന്ന വിചാരമില്ലെന്നതോ പോട്ടെ ,അവനവനും മക്കൾക്കുമൊക്കെ ആരോഗ്യത്തോടെ ജീവിക്കണമെന്നെങ്കിലുമോർക്കണ്ടേ...ഇങ്ങനെയിവർക്കിപ്പോൾ പലതരം പനികളും വരുന്നുണ്ടത്രെ...എന്നിട്ടുമീ വിഡ്ഡികൾ പഠിക്കുന്നില്ലല്ലോ...വെറുതെ മഴയേയും മറ്റു പലതിനേയും കുറ്റവും പറഞ്ഞ് ,കാശത്രയും ഡോക്ടർമാർക്കും മരുന്നുകമ്പനിക്കാർക്കും കൊണ്ടുകൊടുത്ത് ആരോഗ്യമില്ലാത്തവരായി ജീവിക്കുന്നു...കഷ്ടം തന്നെ...

അശോകം ......

2010-06-12T06:27:00.002+05:30

ഇത് അശോകം [Saracca indicca]പണ്ട് രാവണൻ ചേട്ടൻ സീതച്ചേച്ചിയെ കട്ടുകൊണ്ടുപോയി തടവിലിട്ട അശോകവനിയിലെ അശോകം തന്നെ!..സുന്ദരിമാരെ വലിയ ഇഷ്ടമാണത്രെ അശോകത്തിന്...മഹാകവികൾ പറയുന്നതാണേ...അശോകം പൂക്കണമെങ്കിൽ സുന്ദരിമാരുടെ പാദതാഡനമേൽക്കണമത്രെ..!...സ്ത്രീരോഗങ്ങൾക്കുള്ള മരുന്നാണ് അശോകം....ഭംഗിയുള്ള ഈ മരം വീട്ടുമുറ്റത്തിനൊരു അലങ്കാരമാണ്..

അശോകം തടിയിലും പൂക്കും

ചെപ്പു തുറന്നപ്പോൾ....

2010-06-10T05:11:00.001+05:30

അശോകത്തിന്റെ വിത്ത്....

ഈ പതയും പതയല്ല.....

2010-06-06T06:43:00.002+05:30

ഇലയ്ക്കടിയിൽ ആരോ സോപ്പ് പതപ്പിച്ചു വച്ചതൊന്നുമല്ലിത്...! തൊഴുകയ്യൻപ്രാണി[preying Mantis] മുട്ടയിട്ടതാണ്.ജീവലോകത്തിലെ ഈ വേട്ടക്കാരൻ കാണാൻ ചെറുതാണെങ്കിലും ഇവന്റെ ചേഷ്ടകൾക്ക് അല്പം ഭയങ്കരതയുണ്ട് കാഴ്ചയിൽ. .ജീവികളെ ജീവനോടെയിവൻ കടിച്ചു മുറിച്ചു തിന്നുന്നത് കാണേണ്ടതുതന്നെയാണ്.അതിനാലിവനെ ചെകുത്താന്റെ കുതിര എന്നും വിളിക്കാറുണ്ട്.ജൈവലോകത്തിൽ പ്രാണികളുടെ എണ്ണം നിയന്ത്രിക്കാൻ സഹായിക്കുന്ന ഇവൻ കർഷകബന്ധുവാണ്...

PREYING MANTIS

ഇവനാണ് തൊഴുകയ്യൻ അല്ലെങ്കിൽ തൊഴുത[PREYING MANTIS]പല നിറങ്ങളിലും വലുപ്പങ്ങളിലും ഒക്കെ ഇവയെ കണ്ടുവരുന്നു..കണ്ടാൽ അയ്യോ പാവം ....ഇടയ്ക്കിടെ മുൻകയ്യുകൾ ചേർത്തുവച്ച് തൊഴുതു പ്രാർഥിക്കുന്നതുപോലെ കാണിക്കുന്നതു കണ്ടാൽ എന്തു സാത്വികൻ എന്നു തോന്നിപ്പോകും .എന്നാൽ പ്രാണികളെയിവൻ പിടിച്ചുതിന്നുന്നതു കണ്ടാൽ ഞെട്ടിപ്പോകും.നനവിൽ വച്ച് ഒരിക്കലിവൻ കൂട്ടുകാരിയെ പാടിമയക്കുകയായിരുന്ന ഒരു ചീവീടിനെ പച്ച ജീവനോടെ കടിച്ചുമുറിച്ചു തിന്നു..

നീല അടയ്ക്ക..!!!

2010-06-05T05:07:00.001+05:30

അടക്കയൊന്നുമല്ല ഇത്…ഒരിനം ഓർക്കിഡ് ആണ്.കേരള –കർണ്ണാടക ബോർഡറിലുള്ള കോട്ടഞ്ചേരീയിലെ നിത്യഹരിതവനത്തിൽ നിന്ന്….

CLIPPER.....

2010-06-04T05:57:00.000+05:30

വേട്ട….

2010-06-01T05:15:00.002+05:30

ഇത് വെള്ളച്ചി…നനവിലെ പൂച്ചക്കൂടുംബത്തിലെ ഒരംഗം. ഇവൾ പ്രസവിച്ചിരിക്കുകയാണ്.രണ്ടുകുഞ്ഞുങ്ങൾ ഉണ്ടായിരുന്നതിൽ ഒന്ന് ആരോഗ്യമില്ലാതെ ചത്തുപോയി.പൂച്ചകൾ ആരോഗ്യം ശരിയാക്കാൻ പ്രസവിച്ച ശേഷം വേട്ടയാടൽ അധികമായിരിക്കും എന്നു തോന്നുന്നു.നമ്മൾ നൽകുന്ന ആഹാരത്തിലെ അപൂർണ്ണതകൾ പരിഹരിക്കാനാണിത്.
ഈ ഓലേഞ്ഞാലിക്കുഞ്ഞിനെ ഇവൾ വേട്ടയാടിയതൊന്നുമല്ല ,കേട്ടോ.നനവിലെ തന്നെ മറ്റൊറു പൂച്ചയാണ് കരിമ്പിച്ചി.അവളും പ്രസവിച്ചിരിക്കുകയാ.മൂന്നു മിടുമിടുക്കൻ കുട്ടികളുണ്ടവൾക്ക്.ഇവിടെ പ്രമാണിത്തം വെള്ളച്ചിക്കായതിനാൽ മഹാമടിച്ചിയും സൂത്രശാലിയുമായ അവൾ കരിമ്പിച്ചി വേട്ടയാടുന്നതൊക്കെ തട്ടിയെടുക്കും.പാവം കരിമ്പിച്ചി.കഷ്ടപ്പെട്ട് പക്ഷിയേയും ഓന്തിനേയുമൊക്കെ വേട്ടയാടിക്കോണ്ടുവന്നിട്ട് തിന്നാൻ പോയിട്ട് രുചി നോക്കാൻ കൂടി കിട്ടില്ല….
ഇവൾ കരിമ്പിച്ചി

വെള്ളച്ചിയുടെ മക്കൾ.രണ്ടിനും ആരോഗ്യം കുറവാ..കാലിനാണ് ബലക്ഷയം.ചൊട്ടച്ചി ചത്തുപോയി….

കരിമ്പിച്ചിയുടെ മക്കൾ. നടുക്കുള്ളവൻ മീശമാധവൻ.മഹാകുരുത്തം കെട്ടവനാ..

ഇപ്പോളിവർ നാലുപേരും രണ്ടമ്മമാരുടെയും പാൽ കുടിച്ചാണ് വളരുന്നത്!!…..

വയൽച്ചേറണിഞ്ഞ്.......

2010-05-29T06:22:00.002+05:30

ഈ സുന്ദരൻ കണ്ണൂർ കാട്ടാമ്പള്ളിയിലെ 43 വർഷങ്ങൾക്കുശേഷം നടന്ന കൈപ്പട് [പൊക്കാളി] വയലിലെ കൊയ്ത്തുത്സവത്തിൽ പങ്കെടുത്ത് വയൽച്ചേറിൻ സുഗന്ധവുമണിഞ്ഞ് നിൽക്കുകയാ...ഭാഗ്യവാൻ!!...

തുമ്പിച്ചിറകിൻ ലോലമാം സുതാര്യമാം...

2010-05-26T06:45:00.000+05:30

സുതാര്യമായ ചിറകുകളുള്ള ഈ തുമ്പി നിസ്സാരനല്ല...കൃഷിയിടങ്ങളിലെ കീടങ്ങളെ നിയന്ത്രിക്കുന്ന ഇവൻ നമുക്കാഹാരം കിട്ടാൻ സഹായിക്കുന്നതോടൊപ്പം കൊതുകുകളെ തിന്നൊടുക്കി നമ്മെ രോഗങ്ങളിൽ നിന്നും രക്ഷിക്കുന്നു...

കോഴിക്കൂട്

2010-05-22T07:15:00.001+05:30

മുറ്റത്തെ മണ്‍തിട്ട തുരന്ന് കോഴിക്ക് ഒരു ഇക്കോ ഫ്രണ്ട്ലി കൂട്.അതില്‍ സ്വപ്നങ്ങളെ അടയിരുന്നു വിരിയിക്കുന്ന കോഴിയമ്മ...വയനാട്ടിലെ ചെതലയം ആദിവാസി ഊരില്‍ നിന്നൊരു ദൃശ്യം

കാ‍ശാവ്

2010-05-19T10:58:00.000+05:30

കായാമ്പൂ..........കണ്ണിൽ വിടരും....

സൂര്യനെക്കാത്ത് ഒരു പ്രണയിനി....

2010-05-17T16:00:00.001+05:30

ആ ദിവാകര ബിംബവും കാത്ത്

നാണീച്ച് മുഖം കുനിച്ച്......

ഞാനുയരാൻ പോ‍വുകയാ..പോരുന്നോ?…

2010-05-13T16:45:00.001+05:30